Aided school 12 dinhmun sang zawkah Halpuah leh ILP-a dan zam tum pawm

Council of Minister chuan aided school 12 dinhmun sang zawka dahna tur chu a pawmfel a, halpuah leh halmawi khuahkhirhna leh inner line pass pek kawnga ruahmanna siam pawh dana hman theih turin a pawm.Chief minister Lalduhoma kaihhruaiin Thawhtanni khan Council of Minister hi an thukhawm a. An pawm zingah halpuah leh halmawi khuahkhirhna tur – Draft the Mizoram Regulation of Fireworks Bill 2026 leh ILP chungchanga dan awmsa aia khauh theihna tur – The Mizoram Inner Line Pass Guidelines 2026 an pawm a. Higher & Technical Education department-in 2019 September 9,-a thutlukna a siam tawh ennawn rawtna, RUSA Scheme hnuaia post 72 siam zinga assistant professor 58 fixed remuneration-a lak tawh regular-a dah chungchang pawh a tel.
Adhoc grant -in- aid school zinga provincialised tura rawtna awm sa tawh chu pawm a ni a. Chakma Autonomous District Council hnathawk thiam loh chantir mi 10 chunga hremna lekkawh chungchang pawh pawm a ni.
Sawrkar ram pahnih – Education department ram Aizawl Venglai ami Aizawl Venglai Local Council hnena hlan leh, Armed Veng South-a Home department ram Armed Veng East Presbyterian Kohhran hnena hlan pawh pawm a ni bawk.
Mizoram chief secretary hlui Dr Renu Sharma, IAS (rtd) chu Mizoram sawrkar advisor atana rawih nawn pawh pawm zingah hian a tel.
Council of Minister thurel chungchangah Mizoram Government Adhoc Aided Higher Secondary School Lecturer Association chuan thuchhuah siamin, hun rei tak an lo nghah tawh HSS 12 provincialise an nih tak avangin sawrkar chungah lawmthu an sawi a. Mizoram zirna in hma a sawn zel theihnan sawrkarin theihtawp a chhuahsak zel a ni tih an hriatin an thla a muang tih an sawi a ni.