AIFF leh FSDL inrem, December thlaah ISL?

AIFF leh FSDL inrem, December thlaah ISL?
Indian football-in harsatna lian tak a tawk mek a, khawvel pum huap football thuneitu sang ber Fifa leh Asian football thuneitu AFC bakah Indian Supreme Court hial a inrawlh a, India rama league sang ber Indian Super League (ISL) season thar khelh tan theih hun tur pawh hriat phak a ni ta lo a; he boruak rit takah hian chanchin lawmawm hriat tur a awm chho ta a, kumin December thla hian ISL Khelh hun tur puan theih tawh a nih a beiseiawm.
All India Football Federation (AIFF) constitution ennawn chu hman theiha peih a la ni lo a, constitution thar hman a nih hma chu Supreme Court lamin AIFF leh sumdawnna lama an thawhpui, ISL huaihawttu ni bawk Football Sports Development Limited (FSDL) inkara contract thar ziah a remti lo a, chuti a nih chuan kumin December thlaa AIFF leh FSDL thawhdunna tawp tawh tur chu inremna thar ziah theih a ni lo a, ISL chhunzawm theih a ni dawn em tih pawh hriat phak a ni ta lo!
Indian football chhunga harsatna awm chingfel tur hian FIFA leh AFC lamin theihtawp an chhuah mek a, football pawl lian pahnih hian Kalyan Chaubey-a kaihhruai AIFF chu tihtur an kawhhmuh a, SC lamin October 30 deadline siama constitution ennawn an pawm theih dan tur ruahmanna siampuiin, deadline hma ngeia General Body meeting ko tur leh tah chuan constitution thar pawh pawm hman ni se, chuti ang chuan karliamta Ningani khan Supreme Court lamah rawtna pawh thehluh fel tawh a ni a, heti a nih chuan December thla hian ISL khelh tan hun tur pawh an puan hman tawh an beisei!
India rama court sang ber thurawn angin karliamta khan AIFF leh FSDL hian inbiakna hun tha tak an hmang thei a; he hunah hian thawhdunna thar ziak tur leh Indian Super League huaihawttu thlang tur ni bawkin tender langtlang chhuah an remti a, an rawtna hi Supreme Court lamah thehlut zui nghalin, pawm a nih chuan Indian football-a harsatna lian tak awm chu a kiang thei tawh dawn a ni.
AIFF leh FSDL hian thuchhuah intawm an siamah India rama football hmasawnna atan inremna (consensual resolution) an siam thei ta tih puangzarin, Supreme Court-a an ‘resolution’ thehluhah chuan heti hian an ziak:
“AIFF chuan sumdawnna lama an thawhpui tur leh ISL huaihawttu tur ni bawk thlang turin tender (open, competitive and transparent tender) chhuah a remti a; chu mi kalphung ang chuan National Sports Development Code 2011, National Sports Governance Act 2025, AIFF Constitution leh FIFA/Asian Football Confederation (AFC) dan hrulah hma a la dawn a; a kalkawngah hian independent professional firm pawh rawih a ni mai thei,” tiin thuchhuah an siam.
AIFF leh FSDL hian tender-te han chhuah a, inremnna thar han buaipui tur hian hun bituk ruat tha an ti a, clubs, broadcasters, sponsors leh stakeholder dangte hnena thu chiang hrilh hman turin October ni 15, 2025 hmaa inchingfel turin thu an dah ta a, an tum anga an kal thei a niha AFC lama an tlang bawk chuan December thla hian league season thar tan hun tur pawh an puang thei tawh tura ngaih a ni.
Tarlan tawh thin angin, tuna AIFF leh FSDL thawhdunna thuthlung, 15-year Master Rights Agreement (MRA) an tih hi kum 2010-a ziah daih tawh kha niin, MRA thuthlung hnuaiah hian kum 2014 atang khan FSDL hian ISL a kalpui tan a, kumin December ni 8 khi MRA tawp hun a ni.
Contract thar ziah chhunzawm mai tura ngaih a nih laiin AIFF constitution ennawn la peih mai theih loh chungchangah Supreme Court a inrawlh a, constitution thar hman a nih hma chuan contract thar ziak tura pawl pahnih inbiak a khap ta bur a; ISL hmalam hun a chian tak lohah chuan ISL club pathum laiin an first team kal tluang lai an titawp lailawk a, an first team player leh hnathawk dangte hlawh pawh an hrensak ta hial rih a, ISL club 11-te dinhmun a chiri zui ta a ni.
August ni 22, khan Supreme Court chuan AIFF leh FSDL-te chu hun bituk chhunga harsatna chingfel turin inbiak a phalsak leh ta a; karliamta Thawhtannia an inbiak hnuah an hmalak tum dan ‘resolution’ an duanchhuah chu karliamta Ningani khan SC-ah an thehlut a, Indian football-a harsatna lian tak chuan kian lam a pan hnai tiin a sawi theih ta a ni.
MRA an la kalpui mek hnuaiah hian FSDLchuan kumtin AIFF hnenah Rs 50 crore an chhunglut zat zat a, ISL chhunga sum chevel hi Mizo player engemawzat pawhin an hlawkpui ve mek a ni.