Aikal la an la awm chuan action lak nghal tawh tur – Chief minister

Aikal lak chungchangah hun an inpe rei tawk tawh a, tun thlenga la an la awm chuan action lak nghal tawh tur a ni tih chief minister Lalduhoma chuan a sawi. Environment, Forest & Climate Change department hnathawh dan thlirpuia Ningania an thutkhawmnaah chief minister chuan sawrkarah aikal la an awm tawh loh an beisei a. An la awm a nih chuan, hun an inpe rei tawk tawh a, action lak nghal tur a ni tih a sawi.
Officer thenkhat, mahni kawl theih chin (entitled) bak sawrkar facilities kawl an la awm chuan, an sawi tawh thin angin lo kir vek se a finthlak hle dawn tih a sawi a. e-office kalpui tumin an inpuahchah mek thu sawiin, sawrkar hnathawkte an intuaihriam ve reng a tul tih a sawi.
Contract inpek kawngah miin a duhsak zawng ringawt a pek thin loh nan ‘integrity pact’ an siam a, hei hi zawm vek turin an inchah tih chief minister hian a sawi a ni.
Biometric attendance tha taka kalpui an duh tih Lalduhoma hian sawiin, “Sawrkar hnathawkte hian hun kan vawng dikin kan hlawh phu in hna kan thawk tur a ni,” a ti.
Service Review Committee pawhin hna an thawh tawh hlawm an beisei tih a sawi a; chhawr tlak ngang loh hnathawktu chu ‘special pension’ pek mai tur a ni tih a sawi.
Hmasawnna hnathawh dawnah forest clearance lak zel a ngaih avangin, hmasawnna hnathawh chak taka an kalpui theihnan tanpui thin turin EF&CC department a ngen tih chief minister hian a sawi a. “Kan ram hian hmasawnna hmel thar hmu thuai thuai se kan duh a ni,” a ti.
Project reng reng Planning department hriatpui loha kalpui an remti lo tih a sawi a. Department-ten inhretawn loin project inang tak tak, inhnaih tak an kalpui hian ramin a hlawkpui tur angin a hlawkpui loh phah thei tih a sawi a ni.
Thutkhawm hi EF&CC minister Lalthansanga’n a kaihruai a. EF&CC officer-ten hma an lakna leh hnathawh presentation an pe a. An report atangin chief minister-in hriatbelh duh a neih leh zawhna a neih chu chhan a ni a, hma lak zui dan tur an sawi nghal zel a ni.
8 December 2023 atanga tun thlengin forest clearance 12 pek fel a ni.
8 A thuphungin project 5 pawm (in-principal approval) a ni tawh a. Project 3 chu approve tawh sa, penal NPV pek loh a awm thung.
8 Project pahnih clearance chu Ministry of EF&CC nghah mek a ni a, dilna lehkha a felfai tawk loh vanga nghah (pending) project 3 a awm.
8 Mizoram State CAMPA Fund cheng vaibelchhe 199 a awm mek.