Aikal lak endikna hnuhnung nei La luite chungah action la dawn
Sawrkar hnathawk, an aia kal tur la te endikna hnuhnung ber chu neih mek a ni a. Hemi peihfel hnua sawrkar thupek zawm loa aikal la luite chungah dan anga action lak a ni tawh dawn. Mizoram sawrkar chuan aikal lak tih tawp a nih theihna’n hma a la zel a. Aikal la mi thahnem tak sawrkar hnathawk zingah an awm tih hria in, inchinfelna hun a ruahman sak. Department hrang hrang atangin aikal la an neih dan report pe turin hriattirna a chhuah tawh a. Sawrkar hun ruat a tawp tak avangin ruahmanna siam niin, aikal lak tih tawp a nih ngei theihna’n sawrkar chuan hma lak a tum a, aikal lo la la ru reng an awm loh nan mipui chu thawhpuiah sawrkar chuan a sawm tih DP&AR minister K Sapdanga chuan a sawi.
Aikal chungchanga hmalak zel dan tur hi August 5 khan DP&AR commissioner & secretary kaihhruaia sawi ho a ni a. Compliance report thehluh hun tiam chhung chu 2024 August 3 khan zo tawhin, department 41 hnen atangin report an dawng tih sawi a ni.
Hmalak zel dan tur an ruahman dan chuan, kumin kumtira DP&AR (ARW) in aikal list a khawnkhawm a, department-ten list an thehluh leh tuna compliance report an thehluh chu endun a, manual checking neih an tum a. Department-wise report siamin, hemi atan hian chawlh la chhunzawm nghal, voluntary retirement emaw invalid pension emaw dil leh a dangte chhinchhiah hran tum a ni.
Cross-checking neih zawha hna la zawm lo, sawrkar thupek zawm lo an awm chuan dan anga action la turin administrative head of department – principal secretary, commissioner & secretary, secretary adt. hnenah action la tura hriattir an ni anga; action an lak dan report hi ni 10 chhungin thehlut tura hriattir an ni ang. Action la lo an awm chuan controlling officer chungah disciplinary proceeding lak tur a ni dawn a. Department zawng zawng en zawh hun nghak loin, en zawh hmasak apiang hriattir nghal zel tura tih a ni.
Heti chunga aikal la ruai chhunzawm zel an awm a nih chuan, controlling officer – head of office, head of department adt. mawhphurhna a ni anga, kal phal tirtu chungah dan angin disciplinary proceeding lak a ni dawn tih sawi a ni.
A ruka aikal ruai an awm leh awm loh endik turin office hrang hrangah ‘surprise checking’ neih tum a ni a. Aizawl district bik chu DP&AR-a thawktuten an endik anga, district dang zawng erawh concerned deputy commissioner-ten mawhphurhna an la ang.
Aikal la te lak chhan thenkhat:
8 Aikal la mi 3300 chuang an awm a; damlohna avanga hna thawk tha thei lo, aikal la nia insawi an tam ber a, chhungkuaa damlo an awm vanga la an awm nual.
8 Zu leh ruihhlo tih vanga hna thawk thei lo, loh theih loha la. Fate ruihhlo ti, kalsan theih loh vanga lak phah leh fate ruihhlo ti fa (an tute) enkawl ngaih vang.
8 Hlawh a tam tawk loh avanga aikal la a, sumdawnna leh hna dang thawk tel.
8 Pasalte hnathawhna/ awmna awmpui duh vanga aikal la.
8 An hna atanga kaisang, an hna chelh thar thawk thiam lo, a thiam zawk aikal laa thawh tir an awm a. Fit tawh lo inti, indaih lohna avanga thawktu la mamawh si.