Aikal lak titawp thei lo

Mizoram sawrkar hnathawkten an aiawha hna thawk tura midang an tirh hi ‘Aikal’ tia hriat a ni . Hei hi sawrkar dan [Central Civil Services (Conduct) Rules, 1964] kalh ni mah se, Mizoram sawrkar lo awm tawh zawng zawngte khan an titawp thei tlat lo. Tihtawp tumin hma an la lo pawh a ni bik lo; mahse tun thleng hian a la tawp thei lo chu a ni a.
Tuna sawrkar tharin thuneihna a lak hlimchhawn pawh khan, aikal lak tihtawp tuma hmalakna chu sawrkar hmalakna langsar hmasa a ni. DP&AR chuan December ni 29, 2023 khan hriattirna a tichhuak nghal a, sawrkar department hrang hranga aikal late leh an lak chhante theh lut turin chawlhkar khat chhung hun hawn a ni a. Report a han lut khawm tak tak a, budget session-ah phochhuah a ni a. Mizoram sawrkar hnuaia department 40 chuang hret awmnaah aikal la 3,365 an awm a, thih hnua aikal la te pawh an la awm cheu a ni awm e.
Hun a han kal leh deuh a, tunhnai June ni 6, 2024-a Council of Ministers thukhawm thurel zingah DP&AR atang bawka agenda lut “Actions warranted against illegal practice of engagement of proxies/substitutes (aikal) by Government servants” chu pawm a ni a. Hemi chungchangah hian rang taka hma lak zui nghal niin June ni 19, 2024 khan Office memorandum tihchhuah a ni. Sawrkar hnathawk aikal late chu memorandum tihchhuah atanga ni 30 chhungin an hnathawhna hmun theuha let leh tura tih niin, a kaihhnawih department-a thuneitute pawh ni 45 chhunga report thehlut vek turin hriattir an ni nghal a. Aikal lak titawp tura hmalakna chu a han kal leh ta poh chu a ni a.
Aikal lak chungchangah hian sawrkar hmasate pawh khan tihtawp tumin hma chu an lo la nasa ve viau hlawm mai. Congress hun lai khan Aikal late laka action lak dan tur chungchanga thutlukna, December 1-2, 2009-a a lo siam tawh chu, 2011 khan Council of Ministers thukhawm chuan a ennawn leh a, khauh taka kenkawh turin thutlukna a siam nawn leh a. MNF hun lai pawh khan Aikal lak khapna order vawi engemawzat tihchhuah ni a, office memorandum pawh 2012 thla tir lamah tihchhuah a ni; mahse, Aikal lak chu a tawp thei chuang reng reng lo.
Aikal lak hi danin a khap bur a, aikal late hian anmahni thu ringawtin aikal hi an la thei reng reng lo; mahse, dilna chu an theh lut thiang a ni ngei ang, a concerned authority lamin an lo pawmsak mai thin niawm tak a ni. Dan bawhchhetu dik tak zawka chu aikal lak diltute ni lovin dan kalha aikal lak lo phalsaktu concerned authority-te hi niawm tak a ni.
Aikal lak tirtu officer chungah hian disciplinary proceedings kenkawh ni ta mai se, a fel chak deuh ber mai lovang maw tih hi ngaihdan awm thei a ni awm e.