Airport hralh tum chhan hre lo

Kum khata nuai 1900 chuang hlep nia sawi Lengpui Airport midang kuta sawrkarin hralh a tum chhan chu hriatthiam a har tih Congress hruaitu John Siamkunga chuan a sawi.
July 26-a Congress Bhavan-a inkhawmah MPCC adviser John Siamkunga chuan, ZPM kaihhruai sawrkarin Lengpui Airport hralh a tum chu enge a chhan an hrethiam phak lo tih sawiin, RTI chhanna atanga a lan danin, airport atang hian kum khatah Rs. 19,66,44,228 hlep a ni a, sumdawnna ropui tak a nih laiin engvanga hralh tum nge an nih, tiin a zawt.
“Tuna kan chief minister Pu Lalduhoma hian, keini kan sawrkar hunah chuan kum 10-15 chhung repair ngai loin kawng kan siam dawn, a ti a. Hei pawh hi kan en dawn a ni,” a ti.
Kum 2008-ah Congress a sawrkar a, rethei takin bul an tan a. VIP quota zawng zawng an surrender a, mi hriat phak bakin an tuar ve tih MLA hlui John Siamkunga hian a sawi. Kum 2018 a thlen meuh chuan Mizoramin sum lama harsatna a tawh thin chu an sukiang thei a, Finance Commission pawh a lawm hle, tia sawiin, “Kan sawrkar chu a tla a, party dang an rawn sawrkar a, Mizoramin sum lamah harsatna nasa tak kan tawk chho leh ta a ni,” a ti.
Tun ZPM sawrkarah kum khat em pawh an la sawrkar hmain sum tam tak an puk belh a, Mizorama la thleng ngai reng reng lo, state budget cheng vaibelchhe 14412 a nih laiin, state sum ba chu vbch. 14034.76 a ni tawh tih a sawi a ni.
“ZPM hian year of consolidation kan hmang an ti a. Hei pawh hi kan hrethiam lo. Sawrkarin leiba a ngah em em laiin a hotu chinin Board chairman, adviser to CM, consultant leh a dangah nihna an inthei sem a, inrenchemna an kalpui dan hi thil mak tak a ni,” MPCC adviser hian a ti.