Aizawl-ah Mahindra BE 6 leh XEV 9e chhawp chhuak ta

Aizawl-ah Mahindra BE 6 leh XEV 9e chhawp chhuak ta
India kutchhuak electric vehicle zinga ngaihven hlawh ber a chhal ngal, Mahindra BE 6 leh XEV 9e te chu Mizorama Mahindra dealer, Mana Motors chuan Bawngkawn-a an showroom an chhawp chhuak ta a, nimin chhun Traffic Police Senior SP, Ruatsanga Ralte-in a khuhhawnna a nei. BE 6 leh XEV 9e te hi Mahindra kutchhuak electric vehicle zinga Mana Motors-in an showroom atanga an hralhchhuah hmasak ber tur an ni.
Ruatsanga chuan khawvel huap pawha zahpuiawm loh leh India rama car ropui tak an tlangzarhna phenah Mizorama Mahindra dealer Mana Motors neitute thawhrimna fakin ngaihsanawm a tih thu a sawi a, car thar pahnih BE 6 leh XEV 9e chu a leitute leh Mana Motors tan malsawmna tam tak thlengtu a nih theih nan duhsakna a hlan a ni.
Mahindra BE 6 hi a model hiam ber, a man tlawm ber Rs 20,84,339 a nih lain a to ber chu Rs 30,11,431-in a lei chhuah theih a, XEV 9e man tlawm ber Rs 23,95,622 a nih lain a to ber Rs 33,82,926-in a lei theih a ni. A man hi on-road price anga tarlan a ni.
Mana Motors Dealer Principal Dr Franklin Lalrinngheta chuan a hun tawn tawhah ropui bik a nih thu a sawi a, khawvel huap car intlansiak Formula E-ah Mahindra a inseng nasa a, No.2 an ni hial tawh a, chumi rah lo lanna chu tuna SUV electric car pahnih hi nia a hriat thu sawiin mipui duh dan khalh nuam, nalh leh chak cho phak tura duan a nih tih a sawi.
Kumin March atangin Mahindra-in India ramah electric car pahnih hi a hralh chhuak tan tawh a, tun thla tir khan thla nga chhungin 20,000 an hralh tawh tih tar langin tun dinhmunah thla khatah 8,000 an siam chhuak a, March 2026 atangin thla khatah 12,000 siam chhuah tumin ruahmanna an nei mek bawk.
India rama passenger car hralh chhuah hnem kawngah Mahindra hi kum kal ta thlengin palina a ni thin a, kumin chhovah hma an sawn hle a, pahnihnaah inhlangkaiin electric car siam kawngah fak an hlawh leh zual.
BE 6 leh EXV 9e thlir zauna hun hmangtu Info Car hotupa Vanlalmuana chuan BE 6 leh XEV 9e chu a pianhmang inang lo deuh mah se a khawl pawimawh hrang hrangah inang a tam a, electric super car niin India rama car chak ber pawl a nih thu a sawi.
Battery chi hnih hmang a awm ve ve a, ARAI-in a pawmpui danin 79 kWh hmang BE 6 hi a range km 682 a ni a, 59 kWh hmangah km 557 a ni ve thung. XEV 9e-ah 79 kWh battery-in km 659 leh 59 kWh-in km 542 a tlan thei ve thung. Vanlalmuana chuan Mizoram kawng chhuk chhoah pawh km 400 vel tal tlan thei tura a rin thu a sawi bawk.
BE 6 hi second 6.7 chhungin 100 kmph a thleng hman a, a top speed pawh 200 kmph a kai a, 282 bhp leh 380 Nm torque a pe chhuak thei a ni.
Muantea chuan, “Kawng engkimah changkang taka siam a ni a, steering tha bik hmangin kawng awm dan a zirin a insiam rem thei a; driver puitu tha bik a ken tel bakah dahna hmun a chep deuh a nih pawhin pawn atangin hun rem theih a ni a, a him tawk em tih endiknaah India rama electric car zingah a him ber a ni,” a ti bawk.