Aizawl Bomb kha tu mawh nge?
Lalthara, IAS (Rtd)
Mizo National Front Youth Gen Secy chuan thuchhuah dated 16-10-23 siamin Rahul Gandhi chu a Pi Indira Gandhi hun lai (March 1966)-a Indian Air Force – in Aizawl an bomb chungchanga Mizo mipuite atanga ngaihdamna dil tura an phutna ka lo chhiar ve a. He thil thleng chungchanga thu thehdarh dik chiah lo (false narrative) kan hmu fo thin hi inhrilhfiah a tula hriatna ka nei a; a hunin a zir bawk a kan sawi ve teh ang.
False propaganda & false strategy of MNF ( MNF thu thehdarh leh hmalakna fuh lo) kha a chhan ber chu ni zawkin a lang. Pu Laldenga leh MNF hriaitute khan, Mizorama Assam Rifles hmunpuite kha kan hneh a, MNF flag darkar 48 kan tar hman chuan, UNO in Mizoram independence chu min pawmpuiin, an puang nghal ang, ti zawngin thu an thehdarh chiam a; Hei hi Aizawl khawpui laili taka awm, Ist AR Bn Hqrs lak tuma kan hnam sipaiten an nunna thap meuha an beih vakna chhuan kha a ni ber a. Kha thil leh ngaihdan kha a lo va mawlmang tak em, tiin tun hnu hian ka ngaihtuah thin. Ist AR Hqrs kha lo la thei teh reng pawh ni se, kan independent phahna tur a awm miah lova; India sawrkar kha a tlawm mai hauh lovang le! Min vuak letna kha a nasa ting mai dawn niin a ngaih theih.
Chu bakah, khawpui lailia sipai Bn Hqrs meuh, family lane te nen veka an insawhnghehna hmun va kah chiam mai kha a strategy a fuh lo. Hnam sipaite tanhmun lakna kha civilian te awm bitna hmunpui a lo nih bawk si avang khan civilian casualties kha a nasa lo thei lo tih hriatsa a ni. Naga hel ho leh India sipaite inbeihna hi India independence tirh atanga intan tawh kha a ni a. Sipai/ AR hmunpui Kohima, Dimapur, Mokokchung, Turnsang etc khawpuia awmte hi vawi khat pawh an kahchilh ngai lo. A chhan chu mipui in an tuar tel lo thei dawn lo, tih an hriat vàng a ni. Hetiang hian rawn ti ngat ta se, mipuiin an sawisel nasain, an lo khap hial zawk ang tih a rinawm! Tun laia hel dangte – Assam, Manipur, Chhattisgarh, Telangana, Jharkhand etc amite pawh hian sipai hmunpui khawpui chhunga awm laktumin an bei ngai lo. Ramhnuaiah, chu pawh khawdai hnai lutuk lovah, an bei (ambush) thin zawk a nih hi!
Kum 1966 khan Mizoram kalpawhna kawng awm chhun chu Silchar-Aijal Road kha a ni mai a. AR ho tih loh chu, India sipai hmun khuarna a awm lo bawk. Tichuan, Mizo hnam sipaitete khan an silai tha ve tak tak (foreign atanga an chawkluh) hmangin Ist AR Bn Hqrs kha an bei to vak mai a, an dang chep tlat a, an electric leh tui connection-te pawh tih chhiat vek niin a lang a; khawpui atanga engmah chakkhai la thei lovin an awm bawk a ni. Chhanchhuah vat an nih loh chuan eng nge an dinhmun tur kha ni ang le? India Sipaite kha a hnaivaiah an awm loh bakah, Mizoram an lo luh mai theih loh nan Silchar-Aijal road kh? tihchhiat a ni nual bawk a, hnam sipaite pawh he kawng dang chat turin an duty ngeia hriat a ni.
India Sawrkarin a sipaite leh an chhungkuate, helho kuta an inpek vek mai hi a phal thei dawn em ni? A lo ralkhat tuilian thlir mai dawn em niang le? Khatih laia Mizo hnam sipaite kha India Sawrkar mitah chuan hel (rebels against the country/nation) kha an ni ve tlat bawk si a! Ist AR Bn te khan (an nupui leh fanaute te nena) thih burh mai hlauhawma an awm lai hian, wireless in SOS message an thawn chamchi ang tih chu a chiang sa a. Chu SOS chu Air Force hmang lo chuan chhan mai theih a ni ta lovin a lang! Mizo Hnam sipaite tanhmun khawhna hmun- civilian areas te kha an rawn kapin an rawn bomb ta a ni maiin a lang zawk. Civiliante an target hran lovang! Heti zawnga thlir chuan, India sawrkar hi zuk dem vak thei dinhmunah kan ding em ni aw? Mizote hi thliarkar rilru put mai kan ching niin a ngaih theih a, hei vàng hian mi dangte thlirna angle hi kan hriatpui ve a ngai fo reng a ni.
He thil hi tun thlenga politics khelh nan leh inchirh theh nana kan la hmang zui zel mai hi chu engemaw zawnga thlir chuan a mawl thlak ve deuh chuan a lang. Politics-a advantage a hman tum tute hi, an strategy leh propaganda dik loh vanga Mizo mipuiten kan tawrhna chungchangah hian a mawh phurtu leh thupha chawitu tur an ni zawk mahin a lang e!