Aizawl by pass road laiah environment a tichhe nasa lo niin MLA-ten an sawi

Aizawl by pass road laiah environment
a tichhe nasa lo niin MLA-ten an sawi
Aizawl by-pass western side sial mek endiktu MLA-te chuan, sawi ang em emin environment lam a tichhe lo nia an hmuh thu an sawi.
PWD minister puitu MLA pahnih – Adviser to CM (Technical) Ginzalala leh T Lalhlimpuia te chuan Aizawl by-pass western side hnathawh mek Muallungthu atanga Sihhmui chhuak tur chu Nilaini khan PWD hotute nen an enho.
ZPM party thuchhuah danin, he hna hi PM Devine Scheme hnuaia thawh niin, RG Buildwell Engineer Uttar Pradesh amiin an thawk a, hnathawhna tur hian cheng vaibelchhe 500 ruahmanin, kum thum chhunga zo hman tura tih a ni. Km.48-a sei tur he by pass road hi tunah bul tan chauh a ni a, km.2 laih a ni tawh.
Kawng entu MLA pahnih hian he kawng hi chhim lam khua, Muallungthu piah lam zawng zawng, Lunglei leh Siaha thlengin mipui tana tangkai tur, zirlai leh zinmite tan Aizawl khawpui tawt lutuk lut loa airport leh rel station tun aia darkar hnih chuanga rei lo zawka thlenna tur a nih avangin sawrkarin a ngaipawimawh a, development-a thlen dawn chuan eng thil emaw talin a tuar a ngai thin a, he kawng laih mek pawh hi tuten emaw environment lam ngaipawimawh lo ang a an sawi ang em chuan an ti lo a ni tih a hmuna an kalchilh hian a chiang, tiin an sawi a ni.
Tuna km.2 leh thawh chinah pawh kawra leivung kal tur danna – Gabion Wall ringawt pawh hmun 6-ah siam a ni a. Project Implementation Unit-in an enpui a, leivung paihna tur disposal site hmun 26-a siam turin thuneitu dil ngai – Forest department, AMC leh Pollution Control Board ah thlen a ni tih sawi a ni.
“Mizoram hi tlangram chhengchhia a nih avangin hnathawh bultannaah khawl (excavator) inher kual hleithei lo, a vung paihtu tur truck lian pawh tlan luh ngawt theuh loh hun a awm a, engemawchen chu kawngthlang lamah a liam lo thei loa, PIU-in uluk taka an vil bawk avangin fur hma in engemawchen ram leilung tichhe tam lo zawnga hma lak zel ni dawn a, sum hi hman zawh ran leh sum pek lehzel tur a nih avangin, tututen emaw contractor-te hi chawl tura lo tih ve ngawt chi a ni lo,” MLA T Lalhlimpuia chuan a ti.
He kawng, km.48 laih turah hian henglai vela ram neituten Mizoram tana pawimawh leh tangkai tur a ni tih hria in, hmundang anga compensation sang tak tak ngiat loin sawrkar nen an indawr thei tih sawi a ni a. A vaiin cheng vaibelchhe 20 sen a ni dawn tih sawi a ni.