Aizawl by pass road siamna tur vbch.500 hman theihna pe
Sawrkar laipuia Ministry of DONER chuan PM- DevINE atangin tlak lama Aizawl By Pass Road sialna tur cheng vaibelchhe 500 chu February 10 khan a rawn sanction. Chief minister Lalduhoma chuan Pathianni tlai khan Union minister of state (independent charge) Dr Jitendra Singh chu New Delhi-a a chenna inah a hmu a, Mizoram hmasawnna tur thil pawimawh leh PM-DevINE atanga sawrkar laipuiin February 10-a cheng vaibelchhe 500 a rawn sanction “Construction of Aizawl By-pass on western side” lungphum hawn dan tur a sawipui.
Prime minister zin chhuah lai a nih avangin Union MoS for the Ministry of Science and Technology, Prime Minister’s Office; Personnel, Public Grievances and Pensions; Department of Atomic Energy and Department of Space Dr Jitendra Singh hian a aiawhin chief minister hi a lo dawngsawng a ni.
Aizawl by pass road sialna tur sanction a ni chu MNF party chuan lawmawm a tih thu a sawi a. MNF sawrkar hmalakna rah a ni, tiin, tuna rorel mekten tha tak leh kut tling taka an chhunzawm ngei a beisei a. An hnathawh a thlithlai reng dawn tih a sawi.
MNF Gen. Hqrs. thuchhuak chuan, Aizawl by pass road (Sairang – Muallungthu) siamna tur mutmawh hnarmawha neitu CM kalchhuak ta Pu Zoramthanga inpekna leh hnathawh a langchhuak ta, tiin, ‘Aizawla lirthei tawt lutuk tizualtu lian tak chu khawpui chhunga bungraw lian phurlut thinte a nih bakah kan kawng ti tlo lo tu a ni tih hriain, Aizawl khawpui helna tur kawng siam a tul tih sawrkar laipuiah a thlen nasa a. Sairang atanga khawchhak lam leh chhim lam panna tur kawng lian siam dan a ruahman a ni,’ a ti.
Chhim lam pan tur kawng hi Sihhmui- Sakawrtuichhun – Tanhril- Tlangnuam – Samtlang leh Lungleng inkarah kalin, Muallungthu ramah Aizawl – Thenzawl kawng a pawh dawn tih MNF hian sawiin, he rawtna hi central hotute pawhin pawmpuiin Union Finance minister-in Pu Zoramthanga hnenah tihhlawhtlin a nih tur thu a lo sawi tawh a, union budget-ah cheng vbch 500 a lo dah tawh a. Mimal ram compensation-ah harsatna awm deuh avangin kum kalta chhung khan sanction hmuh hman a ni lo tih a sawi a ni.