Zodintluanga, Ex-Minister
-- Advertisement --
Tun hnaiah Cyclone Remal avangin Aizawl khawpui chuan tui lâkah harsatna kan tawk a, kan tawk rei ta fû mai. Ruah tui a tam viau pawhin min chawmtu tui lâkah kan buai a, tlâng rama cheng kan nih miau avangin kan tawn turah ngai ang.
Aizawl khawpui chawmtu tui lâk hi Brig. |henphunga hun atang khan mumal taka kalpui a lo ni tawh a, hma a sàwn chhoh zel dante pawh hi kan hriat a tul awm e.
Greater Aizawl Water Supply Scheme Phase-I:
Aizawl tuilâk hmasa ber hi kum 1983 khan tender tih chhuah a ni a, 1984-ah hna pêk a ni a, hnathawktute chu Civil Works: Western Indian Industry Ltd. Kolkata Mechanical Works: Subhash Project and Marketing Kolkata an ni a. Hna tan hun hi April ni 5.1984 niin, Commission hun chu November ni 7, 1988 a ni a, a hautak viau ang huin an zo tlai lo hle a ni. Phase-I hi mihring 80,000 chawm tura ruahman a ni a, a aia tam fê erawh a chawm thung. Phase-I hi ni khata litre maktaduai 10.8 pump thei turin (10.8 mld) an duang.
Greater Aizawl Water Supply Scheme Phase-II:
Khawpui thang zêlah Phase-I tuilak chuan Aizawl khawpui a chawm zo tawh lo a, Pu Lal Thanhawla kaihhruai Congress sorkar chuan November ni 29, 1997 khan Aizawl chawmtu tur tuilak Phase -II tender a ti chhuak ve leh ta a. 2/11/1999 (letter of intent pek ni) kha niin, March 2000 khan hna tan a ni ta a. Phase-II 24 mld (ni khata litre maktaduai pump theih zat) ni khata pump thei turin an duang.
Mizoramah Congress sorkarna a tla a, Phase-II chu MNF sorkarna hnuaiah chhunzawm ni mah se, chhunzawm mumal a nih tâk loh avangin Aizawl khawpuiin a mamawh êm êm chu a tawl titih ta a ni.
Congress sorkar a lo piang leh a, Aizawl khawpui mamawh Greater Aizawl Water Supply Scheme Phase-II chu theih tâwp chhuahin tharthawh leh a ni a, Mihring 3,10,000 chawm tura duan a ni ta a ni. November ni 28, 2009 khan ‘contract terminate’ a ni a. A hna te pawh department in an thawk chhunzawm a, Congress sorkar chuan theihtawp chhuahin December 2012-ah Phase-II hi zawh fel a ni ta a ni.
Pipe puak harsatna: Greater Aizawl Water Supply Scheme Phase-II-ah hian harsatna a awm fo mai a, pipe-te hman rim a nih bakah a lo hlui ve zêl a, a puak fo a ni. Pipe puak harsatna hi PHED changtu Minister ka nih ve lai pawh khan kan harsatna lian tak zingah a tel a, theih tâwp chhuahin Department thawktute thahnem ngaihna nen kan thlak thei ta vek a, he harsatna hi sutkian a ni ta rih kan ti thei ang.
ADB atangin Phase-III:
Government of India chuan Asian Development Bank atangin North Eastern States 5-ah Urban Infrastructures development Projects atan Rs. 1390.64 Crore Loan (Cost sharing ADB 70% and 30% GoI) a la a. Projects Loan hi 5-State North Eastern States ah 90% Grant GoI leh 10% soft Laon angin a pe a ni. He ADB Project- North Eastern Region Capital Cities Development Investment Program (NERCCDIP) sum hi State sawrkar in matching share tur neiloin Central Cabinet Meeting,GoI in a remtih sak a ni. Government of India sum 100% hman a ni.
Loan amount zat atang hian Mizoram State bik tan a ruahman chu Rs. 330.07 Crore a ni a. Project Loan hi Loan number hrang pathumah then a ni a. Mizoram State Sawrkar chu Project hna thawk tha leh chak a nih avangin ADB leh Government of India chuan a tira tel lo Augmentation of Aizawl Water Supply for 37 MLD (Phase-III), tuna Tlang lui Setlak atang a tui pump chhohna senso tur chu States dangte chan ai atangin pek belh a ni a. A vaiin Mizoram State bik tana sum ruahman zat pawh Rs. 330.07 crore ( 23.73%) atangin Rs. 703.43 Crore (50.58 % ) ah tih san sak a ni.
Augmenation of Aizawl Water Supply (Phase-III) hi a capacity chu 37 MLD a nia. He project hian Aizawl mi cheng 4,45,000 chawm thei tur a duan a ni a. Intake works, Pump Houses, Treatment Plant 37 MLD), Pumping main 711 mm diameter etc te an ni. He hna hi M/s Eco-Protection Ltd, Chenai henah Rs. 15.67 Crore a thawk turin thlan a ni a. Project hi zawh fel thawkhat a niin commissioned tawh a ni.
132kV Power Transmission Line & Sub-Station Dihmunzawlah :
Aizawl tuilakah hian power avanga harsatna a awm fo a, ‘dedicated line’ hi kan mamawh hlê thin a ni. He 132 kV power hi Greater Aizawl Water Supply Scheme Phase I & II tana Power Supply tih chang tlunna a ni a. Hei hian tun hmaa Power Supply duh tawk leh mamawh huna hmuh theih thin loh chu regular leh mamawh zat pe thei turin hna zawh fel tawh a ni.Luangmual Power Sub-Station atanga Dihmunzawl thleng 132 kV transmission line siam, 132 kV sub-station Dihmunzawlah leh chuta tang a Pump Houses tana 11kV substation a pek leh chhawnna te a tel.
Gravity hmanga tuilâk:
Aizawlin tui a tlakchham loh nan kan official fel tak tak ten theih tâwpin hma an la reng a, an thawhrimna leh ngaihtuah nasatna azar liau liauin tawi tlâng atangin ‘gravity’ (leihîpna) hmanga tuilâk a nih theih nan kum 2018 khan phalna kan thmu hman a. Hei hian nasa takin min chhâwk dawn a, kan chhawr hle ang. MNF sorkar pawhin nasa taka chhunzawmin tunah hian zawh tep a ni.
PHED changtu ka nih hlima ka ngaih pawimawh em em chu van ruah tla khawl hi a ni a (rainwater harvesting), tun hnuah mi tam takin hemi kawngah hian hma kan la niin ka hriaa a lawmawm hle mai. Tui khawlna ‘barrel’ lei kawnga sum hmang hreh lo tura infuihna pawh nasa takin kan sawi ve thin a, a takin hmasawnna kan hmu zel hi thil lawmawm a tling e.