Aizawl district-ah CD Ratio nei hniam ber YES Bank-in 5.30%
Aizawl district-ah CD Ratio nei
hniam ber YES Bank-in 5.30%
Bank hoin an hnena sum dahluh leh mipui hnena loan hmanga an pekchhuah khaikhinna credit deposit ratio chu a chhe berah za zelah 65 vel tal ni tura chhut a nih laiin, Aizawl district-a bank awm ho zingah sawrkar kum kal mek quarter hnihnaa CD ratio chhe ber YES Bank chuan zaa 5.30 chauh a nei.
District Consultative Committee, District Level Review Committee leh District Level Security Committee Aizawl chu Thawhlehni khan an chairman, bawrhsap Er Lalhriatpuia kaihhruaiin an thukhawm a. Quarter khat, July – September chhunga Aizawl district-a bank hnathawh leh sawrkar department nena central scheme leh project tih hlawhtling tura an thawhho dan thlirlet a ni.
Aizawl district-ah hian sawrkar kum kal meka quarter hmasa berah CD ratio hi zaah 44.22 a nih laiin, quarter hnihnaah hian zaa 52.31 a ni a, zaah 8.08 in a pung. CD ratio sang ber chu Indian Bank niin 484.64% a ni a. A tlem ber YES Bank chu 5.30% a ni.
Aizawl district-ah bank 24 awm zingah CD ratio 20% hnuailam bank pali an awm a. 20% to 30% inkar nei bank pathum, 30% to 40% inkar nei bank pakhat, 40% aia tam CD ratio nei bank 16 an awm a ni.
Annual Credit Plan hnuaiah hian agriculture sector-ah 22.90% achievement awmin, MSME sector-ah 58.68% leh other priority sector-ah 36.39%, a vaiin 44.54% a ni. Quarter ended September 2025 chhung hian KCC loan pekchhuah chu nuai 3111 a tling.
Financial inclusion hnuaiah PMJDY account hawnga Aadhaar card nena link tawh 103147 an awm a. Social security schemes – PMJJBY, PMSBY leh AYP hnuaiah a vaiin mi 153551 an inziaklut tawh a ni.
PMMY hnuaia bank loan pek chhuah dan thlirho a ni a. Non performing assets-ah priority sector leh non priority sector a hmalakna thlirho a ni bawk. PS-ah quarter ended June 2025 aiin 1.71% in a thlahniam a, NPS-ah 0.02% in tlahniam ve thung.
Chairman chuan banker-te chu mipui rawngbawlna rilru pu loa, hlawkna (profit) ngawt ngaihtuah banker anga kan ngaih palh a hlauhawm, tiin, chutiang banker an awm chuan an lakah an thikthu a chhia in, an hawihawm lutuk bik dawn lo tih a sawi a ni.