Aizawl district-ah HIV kai 4%

On Mar 27, 2026 3 0

Aizawl district-a HIV dinhmun thar berah chuan kum 15-49 inkar zingah 4%-in HIV an kai anga chhut a ni. Hei hi tun hnaia Aizawl district-a AIDS Prevention and Control Committee (DAPCC) thutkhawmnaah tarlan a ni.
Kan hriat angin, India ram puma kum 15-49 inkar HIV/AIDS kai chawhrual chu za zela 0.20 (0.20%) a ni a. India rama HIV/AIDS hluarna ber state chu Mizoram a ni a, HIV kai zat hi za zela 2.73 (2.73 %) a ni. Mizoramah rau rau pawh, Aizawl district-ah chuan HIV/AIDS kai zat hi chawhrualin za zela 4 (4%) a ni. Chumi awmzia chu, Aizawl district chhunga thisen test tawh zawng zawng hi group khat za zelin dah hrang ta thliah ila, group tinah HIV/AIDS vei mi pali (4) zel an awm tihna a ni. Sawi tawh thin angin, HIV/AIDS kaina tam ber chu mipat hmeichhiatna hmanna (sex) atangin a ni.
Mizoram dawtah hian Nagaland a awm a, HIV rate hi 1.37% a ni a, Mizoram chanve a ni. Pathumna chu Manipur niin 0.87% a ni a, Meghalaya 0.43%, Tripura 0.37%, Arunachal Pradesh 0.25%. Chumi awmzia chu, India hmarchhak state 6 te hi national average aiin an sang vek tihna a ni.
Hmarchhak state zingah rau rau pawh, HIV rate sanna state pathum Mizoram, Nagaland leh Meghalaya-te hi Kristian tamna an ni a, Kristian-te hi khawsak phung (lifestyle)-ah hian kan zalenna hi kan hmang thiam lovin kan inthlahdah bik riau em ni ta ang le?
Mission AIDS Suraksha Goal 95:95:99 hnuaia Mizoram dinhmun atang hian, HIV kai zingah damdawi ART (Antiretroviral Therapy) la tha lo an tam tih a hriat a, hetah hian tanlak a ngai hle tih a lang. He Mission ang hi chuan, ART hi 95% talin an la tur a ni tih a nih laiin, 88.5% chauhvin ART an la a, ART la lo hi HIV kai zingah 6.5% an la awm tihna a ni a, hei hian HIV darh zel tur ven kawngah khawlhkham nasa tak a siam thei dawn tihna a ni.
HIV/AIDS-a Mizoram dinhmun hi a tha lo takzet a, national average let 13 chuang zeta sang kan nih laiin, kan dawt chiah Nagaland nena kan inthlauhna hi a sang leh em em a; Mizoram zatve ang a ni. Tunhmain Nagaland leh Manipur hi an sang zawk thin a, HIV/AIDS kan do tlang vek a, Mizoram hi engatinge kan hniam ve theih tak tlat loh? tih hi zawhna lian tak a ni.