Aizawl district-ah thalai 100-ah 4 ang zelin HIV kai

Aizawl district-ah thalai
100-ah 4 ang zelin HIV kai
Aizawl district-a HIV dinhmun thar berah ‘thalai’ huanga dah theih, kum 15-49 inkar zingah mi 100-ah 4 chuan HIV an kai anga chhut a ni.
District AIDS Prevention and Control Committee (DAPCC) Aizawl chu an chairman, bawrhsap Er Lalhriatpuia kaihhruaiin Nilaini khan an thukhawm a. Hetah hian Aizawl district-a HIV dinhmun hi sawi niin, kum 15-49 inkar lakkhawmah HIV kai hi za zelah 4.049 a ni.
Mission AIDS Suraksha Goal 95:95:99 awmzia leh thil tum – People Living with HIV (PLHIV) 95% talin an nihna an inhriat theihna tura zau zawka test neih; HIV hrik pai 95% ten Antiretroviral Therapy (ART) tha taka an lak; ART latu 99% ten an thatpuia midang kai chhawng thei lo khawpa viral load hniam an neih dan tur sawiho a ni.
Mission AIDS Suraksha-ah hian Aizawl district dinhmun thlirho a ni a, tunah HIV kai zaa 94.5-in an nihna an inhria a, zaa 88.5-in ART la mekin, zaa 98.3-in midang kai chhawng thei lo turin an thatpui a ni.
2025 October leh November chhung khan Aizawl district khua 26 an thlanchhuah atangin mi 6504 hnenah leh an khaw hruaitute hnenah HIV chungchang chiang zawka inzirtir niin, HIV leh Syphilis test tihsak an ni.
HIV darhzau zel tur ven kawngah chak zawk leh tha zawka Aizawl district-in hmasawnna a hmuh theihna turin Integrated Action Plan (IAP) for Aizawl District sawiho a ni a. IAP hnuaia hmalakna tur thenkhat sawiho a ni bawk.