Aizawl FC 3-1 Chanmari FC

September ni 11, Ningani khan Mizoram Premier League 12 khelh chhunzawm a ni a, hmahruaitu nih inchuhna inkhel pawimawh takah Aizawl FC in 3-1 in Chanmari FC an hneh a, hmahruaitu an nihna an sawh nghet. Tlawm lei lova Aizawl FC an kal tluan zel laiin a vawi khat nan Chanmari FC an tlawm ve thung.
MPL 12-ah tlawm nei lova kal tluang a, tbale chung luahtu pahnih Chanmari FC leh Aizawl FC te inkhel tur hian ngaihven a hlawh a. I League-a inel zui tur an nih vangin ngaihven a hlawh leh zual. I Inkhel ngaihven hlawh tak a nih ang ngeiin inkhel hmuhnawm pawh a ni a, goal li luhnaah Aizawl FC an chungnung zawk.
Champion lai Aizawl FC hian an elpui lian Chanmari FC lakah an khel tha a, darkar khat hmain goal thum ngawt an thun hman. AFC tan hian Lalawmpuia Sailo chuan minute 37-naah hmahruaina goal a thun a. Chawlhlawk dawn hnaih minute 45-naah Zomuansanga chuan an goal hnihna a thun belh zui leh bawk a, si hnih faia hmahruai chungin chawlhlawk an hmang.
Chawlhlawk hnu lamah Aizawl FC an khel tha chhunzawm a, Vincent Lalduhawma chuan minute 50-naah an goal thumna thunin an hmahruaina a tizau. Si thum ngawt an phurh hnuin CFC tan Laltluangliana chuan minute 62-naah goal thunin an si phurh a sut then. An si phurh an sut vangin phur viau mah se goal dang an thun belh thei tawh lova, an elpui lian Aizawl FC lakah an tlawm zui ta a ni.
Chanmari FC lakah an chak vangin Aizawl FC in point 16 hmuin table chung ber an luah a, AFC aiin point thumin an sang ta chiah a ni.