Aizawl FC an chak ve ta

On Jan 24, 2025 5 0

January 22, Nilai zan khan Indian I League khelh chhunzawm a ni a, RG Stadium, Mualpuia inkhel hmuhnawm takah Aizawl FC chuan an mikhual Delhi FC chu 4-2 in an hneh. Delhi FC lakah hian Aizawl FC tan Lalrinzuala chuan hattrick a siam.
Chak harsat Aizawl FC hian RG Stadium-ah an chung chiaha awm Delhi FC an mikhual. An mikhual lakah bul tan chhe viau mah se ropui takin hnehna an chang let. Hnehna an chan theih nana thawhhlawk em em chu goal thun thei Lalrinzual a ni. Mikhual team Delhi FC hian bul an tan tha viau a, inkhel tan atanga minute 10-na lekah Junior Onguene chuan hmahruaina goal a thun. 3-0 ngawta an hma an hruai chung pawha tlawm leh khut Aizawl FC hi an mualah an tlawm leh nge nge tura ngaihna lian tak a awm hman.
Hma takah goal chhuah mah se AFC an insiamtha thuai a, an si phurh an sut har lo. Lalrinzuala chuan minute 19-naah goal thunin an si phurh a sut. An si phurh an sut vangin phur viau mah se an phur rei lo. Delhi FC tan Rahul Rawat chuan hma an hruai nawn lehna goal a thun a, AFC an hnufual nawn leh. Hnufual nawn leh mah se Zothanpuia chuan minute 43-naah goal thunin an si phurh a sut a, 2-2 a inhnehtawk chungin chawlhlawk an hmang.
Chawlhlawk hnu lamah goal thun thei Lalrinzuala a inlar a, goal hnih thunin a team a chakpui. I League-ah season khata goal thun hnem ber record lo siam tawhtu Lalrinzuala hian minute 60-naah hma an hruai letna goal a thun. Minute 75-naah hattrick a puitlina goal a thun zui leh a, Aizawl FC hmahruaina a tizau. Zuala hattrick hmangin Aizawl FC hian hnehna hlu tak an chang a, point thum hlu tak an hmu. An muala point thum an hmuh hmangin AFC hian hma an sawn hret a, an chunga awm Delhi FC lehpelin 10-naah an inhlangkai.
I League season liam taah goal 15 zet thun a record siamtu Lalrinzuala hliam a dam a, goal a thun chho leh tan Delhi FC lakah goal thum a thun leh tak vangin Zuala hian I League 2024-25-ah vawi 8 khelin goal 7 a thun leh der tawh. Season liam taah a khelh that em vangin Zuala hi India squad lailawkah telh a ni hial a, hliam vangin India team a zawm thei lo. I League-ah a chet ropui vangin ISL club lian Mohun Bagan Super Giant a zawm hman teuh viau a, hliam vangin an indawrna a tlawlh ta tlat thung. A hliam dam hnuah a khelh that zui leh tak vangin Zuala hian season tharah chuan ISL a khelh tawh ngei a beiseiawm.