Aizawl FC an chak zel

September 16, Thawhlehnia Mizoram Premier League 12 khehah hmahruaitu Aizawl FC in 5-1 ngawtin Dinthar FC an hneh. Aizawl FC hi an elpui lian lakah an chak zel a, tlawm nei lovin an kaltluang chhunzawm zel.
Tualchhung football a hnuhma nei tha leh MPL 12-ah pathumnaa mek Dinthar FC hian table-a hmahruaitu Aizawl FC lakah bul an tan tha viau a, inkhel tan atanga minute 10-na lekah Laltluangzela chuan hmahruaina goal a thun nghal. Dinthar in hma taka goal an thun hian Aizawl FC a chhaihkawlh tlat thung a, chawlhlawk hmain goal thum ngawtin an khingpuite an chhanglet hman.
Goal an chhuah atanga minute riat hnu lekah Vincenr Lalduhawma chuan Aizawl FC tan goal thunin an si phurh a sut. Khel tha bera thlan zui tak Vincent-a hian minute 34 leh 42-nah te goal thun belhin hattrick a siam a,. Vincetnt-a goal thum thun hmang hian 3-1 ngawta hmahruai chungin Aizawl FC in chawlhlawk an hmang.
Chawlhlawk hnu lamah Aizawl FC an khel tha chhunzawm a, goal hnih an thun belh zui leh. Khel tha tak Lalhruaitluanga chuan minute 73-naah an goal lina thunin a hmahruaia a tizau te te a. Hruaia goal thun hnu hian Laltlanzova chuan Dinthar laka an goal ngana thunin a tawp a khar a, an elpui lian zinga mi Dinthar FC lakah 5-1 ngawta hnehna changin point thum hlu tak an hmu.
I League club Aizawl FC hi MPL 12-ah tlawm nei lovin an kal tluang zel. Thawhtanni khan an hnuai chiaha awm Chanmari FC chuan Saikhamakawn FC lakah hnehna an chang zo lo. Chanmari FC an chak zawh loh laiin Dinthar FC an lo tlawm leh bawk si a, Aizawl FC hian hma an hruai fal theih phah ta a ni.