Aizawl FC in phuba an la

September 13, Zirtawp ni khan RG Stadium, Mualpuiah LZ Juice MPL 11, Round 10-na khelh a ni a, inkhel hmuhnawm takah Aizawl FC in champion lai Mizoram Police FC an hneh a, hmahruaitu thar an ni. Round 10-a inkhel hmasa zawkah Chawnpui FC in FC Bethlehem lakah point thum an hmu ve bawk.
AFC in phuba an la
MPL 11 ah tlawm nei lova kal tluang mek Aizawl FC hian I Day tournament final-a an hneh loh Mizoram Police FC an hmachhawn a, fiahna hautak tak paltlangin phuba an la. MPL leh I Day champion Mizoram Police FC lakah an chak vangin Aizawl FC hian round 9 an khelh thlenga tlawm nei lo Chanmari FC chu point khatin an lehpel lai lawk a, table chung berah an awm.
I League club Aizawl FC hian champion lai Mizoram Police FC lakah bul an tan tha viau a, darkar chanve em pawh an khelh tlin hmain goal hnih an thun hman. Inkhel tan atanga minute sarihna lekah Samuel Lalmuanpuia chuan hmahruaina goal a thun. Hma takah goal an thun hian AFC a fuih phur viau a, inrintawkna sang tak nen an inlan zui theih phah.
Hma taka goal an thun hnuin Aizawl FC an khel tha chhunzawm viau a, goal pawh an thun belh leh thuai. Season kal meka chetha tak Lalbiakdika chuan minute 27-naah an goal hnihna a thun a, an hmahruaina a tihzau belh. Aizawl FC in goal hnih an thun hnuin inkhel a hmuhnawm zui viau a, MPFC in an si phurh sut tuma an khingpuite an nawr a hmuhnawm thei hle. MPL leh I Day champion lai MP FC tan hian Lalbiaksanga chuan minute 89-naah goal thunin an si phurh a sut then. Hun tawp dawn hnaihah goal an thun vangin an phur thar viau a, tlawm pumpelh ngei tumin tan an khawh. Point hmuh tum viau mah se MPFC hian goal dang an thun belh thei tawh lova, Aizawl FC lakah uiawm takin an tlawm ta a ni.
Champion lai Mizoram Police FC an hneh tum hian Aizawl FC tana khel tha tak Augustine Lalrochana chu Kuriz man of the match-ah thlan a ni.
MPL season kal mekah lawm la nei lo Aizawl FC hi Mizoram Police FC an hneh hma pawhin semi-final lut turin an dinhmun a tha sa viau tawh a. An elpui lian zinga mi MPFC an hneh zui leh vangin semi-final lut chiang tluk an ni der tawh a, an chesual hle a nih loh chuan semi-final an lut ngei dawn niin a lang. Aizawl FC lakah tlawm mah se Mizoram Police FC pawhin semi-final luh theihna hun tha an la nei zui tho bawk.
Chawnpui FC an chak
Table hnuai lama awm mek Chawnpui FC chuan round 9-naah an hnuaia awm FC Bethlehem an hmachhawn a, 3-1 in hnehna an chang. Table hnuai lam luahtu pahnihte inkhelah hian chawlhlawk hmain goal a lut mawlh mawlh a, chawlhlawk hmanin goal li ngawt a lut hman. Chawlhlawk hmaa goal an thun hmangin champion hlui Chawnpui FC in 3-1 in hnehna an chang.
Chawnpui FC tan hian Nangsianliana chuan inkhel tan atanga minute 12-naah hmahruaina goal a thun. Hma takah goal an chhuah vangin FC Bethehem an talbuai a, goal an chhuah belh leh thuai. Chawnpui tan hian Lalthanzuala chuan minute 14-na lekah an goal hnihna a thun a, an hmahruaina a tizau. Minute hnih chhung lekin goal hnih chhuah hman mah se FC Bethlehem an insiamtha thei chuang lo. Lalthanzuala goal thun atanga minute li hnu lekah Jessie Lalmawizuala chuan Chawnpui FC goal thumna a thun zui leh a, minute 18 an khel tling awrh tihah FC Bethlehemin si thum ngawt an phur hman.
Minute 18 hma lamah talbuai viau mah se Hriatpuia enkawl FC Bethlehem an insiamtha a, an khel tha tawlh tawlh. Goal an chhuah belh tawh loh bakah Malsawmzela chuan minute 41-naah goal thunin an si phurh a sut then. Chawlhlawk hnu lamah point hmuh ngei tumin tan khawh mah se an chung chiaha awm Chawnpui FC lakah tlawm an pumpelh zo ta lo a ni. He inkhelah hian Chawnpui FC chak nana thawhhlawk Lalropuia chu Kuriz man of the match ah thlan a ni.
FC Bethlehem lakah an chak vangin Chawnpui FC hian khelh kua atangin point 11 an hmu a, panganaah an inhlangkai. Chawnpui FC in hma an sawn lai hian FC Bethlehem erawh chuan table mawngphah an luah nghet ve thung.