Aizawl FC leh Chanmari FC an chak

September ni 8, Thawhtanni khan RG Stadium-ah Mizoram Premier League 12 khelh chhunzawm a ni a, table chunga awm pahnih; Aizawl FC leh Chanmari FC ten hnehna an chang ve ve a. Table hmahruaitu a la danglam theih rih lo.
Thawhtannia inkhel hmasa zawkah pahnihnaa awm mek Chanmari FC in MLS an hmachhawn a, 3-1 in hnehna an chang. Chanmari FC tan hian Aron Vanlalrinchhana chuan inkhel tan atanga minute 21-naah hmahruaina goal a thun. Aron-a goal thun hnuin goal a luh belh thei lo reng a, goal thun tumin an innawr tawn nasa hle. Hun tawp dawn hnaih lam minute 72-naah Michael Lalbiaksanga chuan CFC goal hnihna thunin an hmahruaina a tizau.
Michael-a goal thun hnuin hun pangngaiah goal dang a luh belh thei tawh lova, hun pek belhah goal hnih ngawt a luh belh ta tlat thung. Minute 90+3 ah Lalruatsanga chuan Chanmari FC goal thumna a thun a. Minute 90+5-ah Ngurthanmawia chuan an MLS goal neih chhun thunin an si phurh a sut then. An si phurh sut then mah se hu tawp thlengin goal dang an thun belh thei tawh lova, I League club Chanmari FC lakah 3-1 in an tlawm zui ta a ni.
Thawhtannia inkhel hnuhnung zawkah pahnihnaa awm hman zuai Aizawl FC chuan Kanan FC an hmachhawn a, table chung ber luah let leh turin Aizawl FC hian si hnih faiin hnehna an chang.
Aizawl FC hian Kanan FC lakah bul an tan tha viau a, inkhel tan atanga minute 4-na lekah Zomuansanga chuan hmahruaina goal a thun nghal. Hma takah goal an thun vangin an phur viau a, inrintawkna sang zawk nen an inlan zui theih phah bawk. Khel tha zui viau mah se goal dang erawh a luh belh har viau thung a, hun tawp dawn hnaih minute 85-naah Vincent Lalduhawma chuan an goal hnihna thunin an chakna a nem nghet a, point thum an hmuh belh.
MPL 12 khelh mekah Aizawl FC leh Chanmari FC te tlawm nei lovin an kaltluang dun zel a, point 13 ve ve hmuin table chung pahnih an luah dun. Aizawl FC hian point 13 hmuin goal difference-ah +5 ngawtin an sang zawk mek thung.