Aizawl FC leh Chanmari FC inlan ni
Mizoram tualchhunga football club te inelna ngaihhlut hlawh ber Mizoram Premier League (MPL) season 12 chu khelh mek niin vawiinah round 5 khelh tan a ni dawn. Round 5 khelh tan niah table chung luahtu pahnih; Aizawl FC leh Chanmari FC te an inlan dawn.
MPL 12-ah vawi li khel tawh a, tlawm la nei lo Chanmari FC chun chhun dar 12:00-ah khelh li atanga point li chauh la hmu MLS FC an hmachhawn dawn. MLS lakah hnehna an chang a nih chuan table hmahruaitu an ni lailawk dawn a. Aizawl FC result a zirin hmahruaitu an ni zui thei dawn bawk. Season kal mekah Chanmari FC hi an khel tha a, vawi thum chakin draw vawi khat an nei a, point 10 hmu tawhin pahnihnaah an awm mek. An chung chiaha awm Aizawl FC nen point 10 ve ve an hmu a, goal difference-ah an chhiat zawk vangin pahnihnaah an awm.
Chanmari FC leh MLS FC te an inkhelh hnu lawkah RG Stadium-ah vek hmahruaitu Aizawl FC in Kanan FC an hmachhawn zui ve leh dawn. Hmahruaitu ni chhunzawm thei turin Aizawl FC hian Kanan FC hneh an mamawh.
I League club Aizawl FC hian MPL 12-ah vawi li khel tawhin vawi thum an chak a, draw vawi khat an nei. I League-a an elpui Chanmari FC nen point 10 ve ve hmu bawk mah se goal difference-ah goal nga ngawta an san zawk vangin table hmahruaitu an ni. Palinaa awm mek Kanan FC hi an hneh a nih chuan hmahruaitu an ni chhunzawm thei dawn.
Aizawl FC laka fiahna hautak hmachhawn tur Kanan FC hian vawi li khel tawhin vawi hnih an chak a, tlawm zawkah vawi hnih an tang tawh bawk. Aizawl FC lakah tlawm pumpelh tumin tan an khawh dawn a, point an hlawhchhuak thei a nih chuan an tan result tha a ni dawn a. Point thum an hmu thei a nih chuan inlehthalna lian a ni ngei ang.
MPL 12 khelh mekah hian rawlthar rual SYS FC ten beisei angin result tha an la hlawhchhuak thei rih lova, khelh li atangin point khat chiah an la hmu. An match hmasa pathuma tlawm zawn tawh SYS FC hian Zirtawpni khan Mizoram Police FC chu 1-1 in an inhnehtawkpui a, a vawi khat nan point an hlawhchhuak. SYS tan hian ohny Lalmalsawmkima chuan minute 38-naah hmahruaina goal a thun a. MPC tan : Lalhmunmawia chuan minute 90-naah an si phurh a sut.
⚽SYSFC : Johny Lalmalsawmkima 38’