Aizawl FC leh Chanmari FC te an chak

Zirtawpni leh Inrinni zan khan Indian foorball League (IFL) khelh chhunzawm a ni a, Mizo club pahnih Aizawl FC leh Chanmari FC ten an mualah hnehna an chang. Aizawl club pahnih; AFC leh CFC te hian table chung an luah dun.
I League champion hlui Aizawl FC hian zirtawp zan khan RG Stadium, Mualpui-ah Rajasthan United an mikhual a, inkhel hmuhnawm takah 3-1 a hnehna changin point thum hlu tak an hmu.
IFL season thara an match hmasa berah uiawm taka chak zo lo Aizawl FC hian Rajasthan United lakah bul an tan tha a, Zomuansanga chuan minute 12-na lekah hmahruaina goal a thun nghal. Hma takah goal thun bawk mah se an goal an venghim rei thei bik lova, mikhual team tan Pedro Astray chuan minute 32-naah goal thunin an si phurh a sut a. 1-1 a inhneh tawk chungin chawlhlawk an hmang.
An mikhual lakah bet zawk leh ball chang tlem zawk ni deuh reng mah se hun tawp dawn hnaih lamah Aizawl FC an insiamtha a, goal hnih an thun. AFC tan hian Vincent Lalduhawma chuan minute 68-naah hma an hruai nawn lehna goal a thun a. Rajasthan United in an si phurh sut tma tan an khawh nat em em laiin Lalhriatpuia chuan hun pek belh minute 90’+5-naah an goal thumna a thunin an chakna a nem nghet a. An mualah 3-1 a hnehna changin point thum an hmu zui ta a ni.
Zirtawp zanah Aizawl FC in hnehna an chan hnuin Inrinni zanah Chanmari FC in an home game hmasa ber an khel zui ve leh a. RG Stadium-a an mikhual Sreenidi Deccan FC chu 2-1 in an hneh a, point thum hlu tak an hmu ve bawk.
IFL a team thar Chanmari FC hian an mualah an khel tha a, hun pek belha Ruatsanga goal thun hmangin an chak. CFC tan hian Jota chuan minute 53-naah hmahruaina goal a thun. He goal hi Sreenidi tan Paulo chuan minute 79-naah a sut. 1-1 a nih hnuin goal a luh belh thei lo reng a, hun pangngaiah goal thun belh an awm lo. Hun pangngai a tawp a, hun pek belh minute 90+3-ah Lalruatsanga chuan goal hlu tak a thun a, Chanmari FC a chakpui ta a ni.
Indian Football League-ah Aizawl FC leh Chanmari FC ten vawi hnih khel tawhin point li ve ve an hmu a. Goal deferrence-a tha zawk Aizawl FC in table chung ber an luah a, Chanmari FC in pahnihna an luah ve bawk. Indian Football League-ah Aizawl club pahnih; Aizawl FC leh Chanmari FC ten table chung an luah dun hi football ngaina Mizote tan mak, mawi leh duhawm tak a ni.