Aizawl FC tan him beiseina thar a awm

Indian I League a Mizo club awmchhun Aizawl FC chuan Shillong Lajon lakah tlawm an pumpelh a. Lajong laka point an hmuh laiin an elpui lian SC Bengluru an tlawm ve thung. Inrinni leh pathiannia I League result vangin Aizawl FC in him theihna hun tha zawk an nei a. I League-a inhamtang turin AFC hian beiseina thar lian zawk an nei.
Tlak hniam pumpelh thei tura point mamawh Aizawl FC hi Shillong Lajong hmachhawn turin SSA Stadium-ah an lenglut. Mikhual an nihna mualah an tlawm teuh hle a. Hun pek belh tawp dawn lama penalty hmangin an si phurh sut zo hramin, point khat hlu tak an hlawhchhuah.
I League khel chhunzawm Lajong hian North East derby-ah bul an tan tha a, Douglas Rosa Tardin chuan minute 30-naah hmahruaina goal a thun. Shillong khawpui ngeiah I League champion lo ni tawh Aizawl FC in an si phurh sut ngei tumin tan an khawh a, Sawma Tlangte chuan minute 35-naah goal thunin an si phurh a sut. Inhnaihchilh taka goal hnih a luh hnuin mualneitu Lajong tan Sheen Stevenson Sohktung chuan minute 42-naah hma an hruai nawn lehna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Aizawl FC in bul an tan tha ve thung a, minute 55-naah Samuel Lalmuanpuia chuan goal thunin an si phurh a sut. 2-2 a nih hnuin inkhel a hmuhnawm zui viau a. Team hnih ten goal hnih ve ve an thun belh zui leh hial bawk nen inkhel entute mit a tlat hle. An mualah chak ngei tuma tan khawh Lajong tan hian goal hmahruai thuntu Douglas Rosa Tardin chuan minute 65-naah an goal thumna a thun a, Lajong in hma an hruai nawn leh.
3-2 a hnufualin, an dinhmun chhe thar leh mah se Aizawl team an zam chuang lo. Lalhriatpuia chuan minute 78-naah goal thunin an si phurh a sut nawn leh. 3-3 a nih hnuin hun pangngaiah goal a luh belh thei lova, hmarchhar team pahnihte an inhnehtawk ngei tura ngaih a ni hman. Hun pangngai tawk hnu hun pek belh minute 90+2-ah Mizo team hneh duhna nei lian tak Lajong tan Phrangki Buam chuan hma an hruai nawn lehna goal a thun leh ta mai a, Aizawl FC tan he goal lut zet hi chu a lungchhiatthlak tak zet tawh. Hun bek belhah hnufual nawn lehin, an dinhmun chhe viau tawh mah se Mizo team leh Mizo player te an zam chuang lo va, Khuangchera leh Taitesena te ang maia huaisen Aizawl FC tan hian na takin Khasi team an nawr a, penalty an hmu. He penalty hi Lalrinzuala chuan minute 90+4-ah inringtawk takin a pet goal a, an si phurh a sut zo. Rinzuala goal thun hnu hian goal dang a luh belh thei lova, inkhel hmuhnawm tak chu 4-4 in a tawp ta a ni.
Shillong Lajong lakah tlawm an pumpelh vangin Aizawl FC hian relegation zone an chhuahsan a, an chung chiaha awm SC Bengaluru chu head to head hmangin an lehpel chiah. SC Bengaluru aia an khelh tam zawk vangin an dinhmun a la him lo viau thung. Hetihlai hian Pathianni tlat khan SC Bengaluru hi Namdhari lakah 2-1 in an tlawm leh ta hlauh. SC Bengaluru an tlawm vangin Aizawl FC hian a him chin 11 la an luah nghet ta a ni.
Tlahniam tuma inel mek Aizawl FC leh SC Begaluru ten hian vawi khat ve ve chiah inkhel hmachhawn tur an nei tawh. Tunkar inrinni hian team hnihte hi an inlan ve ve dawn. Aizawl FC hian an mualah Namdhari an mikhual dawn a, Mizo mipui tawiawmna nen an chak theih a beisei awm. Hetihlai hian SC Bengaluru FC chuan Mimualah Sreenidi Deccan an hmachhawn ve thung dawn. Aizawl FC leh SC Bengaluru te hi an match hnuhnung berah an chak ve ve a nih chuan Aizawl FC an him ang a, SC Bengaluru an tla ang. Hetiang chiah hian an tlawm ve ve a nih pawhin Aizawl FC an him tho bawk ang. I League-a Mizo team awm pawimawhzia hriain an match hnuhnung berah football ngaina mipuiin tha takin i tawiawm ang u! I League club neih hi Mizotan a tha a nia.