Aizawl Half Marathon-ah 3000 dawn tel
Aizawl Half Marathon-ah 3000 dawn tel
Mizoram Sports & Youth Services department leh Innovations India tangdunin “Connecting India, Developing Mizoram, Empowering Sports” tih thupui hmanga an buatsaih – ‘2nd Aizawl International Half Marathon (AIHM)’ chu Inrinni khan Rajiv Gandhi Stadium Mualpui Salem Veng atanga tlanchhuakin neih a ni a. Km 21.1 tlanah hmeichhe huangah Renu Singh (Uttar Pradesh) pakhatna a ni a, mipa-ah Kemboi Kevin Kiprono (Kenya) pakhatna a ni.
Half marathon-a telte vailiamtu larsap Gen. Vijay Kumar Singh (Retd) chuan India ram hmun hrang hrang bakah ram dang atanga rawn tel engemawzat an awm chu fakawm a tih thu sawiin, hei hian AIHM chu khawvel huap a nih zia a lantir a, a thanchak zia leh khawvel hriat a hlawh zia a lantir tih a sawi. AIHM chu Mizoram mawina leh boruak thianghlim phochhuahna hun remchang a ni, tiin, hmun dang atanga lokalte chu khualtha an ni tel tih a sawi a ni.
AIHM 2026-a tel mi 3000 dawn hi Inrinni zing dar 6.30 atangin an tlanchhuak tan a, category hrang hrang 9 – 21.1 km Half Marathon, 10 km Open Race, 5 km Fun Race, 5 km Junior Race leh 5 km Senior/ Veteran (kum 60 chin chunglam) Race-ah then a ni a. Senior category tih loh a dang zawngah hian mipa leh hmeichhia a hranga then a ni. India ram state hrang hrang bakah ram dang – Kenya, Ethiopia, Bahrain, United Kingdom, France atangin international runner 16 an tel a. Lawmman cheng nuai 15 chuang sem chhuah a ni.
Aizawl International Half Marathon tum khatna nikum April 26-a neihah mi 1500 vel an tel a. tun tumah hemi let dawn an tel a ni. He marathon hi Athletics Federation of India-in a pawmpui bakah Sports Authority of India-in a thlawp a. Intihsiak a nih piahlamah Mizoram tlawhtute tan a mawina leh a chengte nunphung pho chhuahna remchang niin, khualzin hipna tha a nih avangin tourism Event Calendar 2026 ah pawh dah a ni.
Marathon-a tlante hi chip nen vek an tlan a, GPS hmangin an thlen chin leh awmna a hriat theih vek a, hemi hmang vek hian a thlen hma dawn pawh tunlai thiamna hmanga endik vek a ni.
Half Marathon Race (21.1 km)
Women category:-
1-na Renu Singh (Uttar Pradesh) chip time 01:21:22 (Rs. 200000)
2-na tsige Debay tadese (Ethiopia) chip time 01:21:35 (Rs 150000)
3-na Marta Hirpato Yota (Bahrain chip time 01:21:36 (Rs 75000)
Men category:-
1-na Kemboi Kevin Kiprono (Kenya) chip time 01:06:28 (Rs 200000)
2-na Nafsena Ejeta Balcha (Ethiopia) chip time 01:06:38 (Rs 150000)
3-na Clinton Kibet Mutai (Kenya) chip time 01:06:39 (Rs 75000)