Aizawl inkalpawhna tih changtlun tumnaa inruahmanna ADB-in endik
Mizoram sawrkarin Asian Development Bank (ADB) hnuaia Project Readiness Financing (PRF) hmanga Aizawl Sustainable Urban Transport Project (ASUTP) a kalpui mekah ‘ADB PRF Mission Visit’ chu May 1-3 chhung an rawn nei.
ADB atanga lokal hi senior transport specialist (Mission leader) Shuji Kimura, senior project officer (Mission member) Kaushal Kumar Sahu, leh ADB staff consultant (Mission member) Alok Bhardwaj an ni a.
Tlaiah UD&PA director Dr Andrew H Vanlaldika hoin an thil rawn enfiah dan tlangpui sawifiah a ni a. ASUTP PMU urban transport specialist Anbuchezhiyan Sundaram chuan PRF hmalakna leh hmasawn dan a sawi a; PPDMC (Mott MacDonald Pvt. Ltd.) atangin Team leader Manish Rege chuan an hnathawh dan leh an hmalak tawhna a sawi a ni.
Aizawl khawpui hmasawnna leh mipui chetvel awlsamna turin Aizawl Sustainable Urban Transport Project (ASUTP) hnuaiah hma lak tan a ni a. He project atan hian ADB atangin Aizawl Urban Transport atan fund thahnem tak hmuh beiseia bawhzui mek a ni. ADB kalphung anga hma lak mek niin, Aizawl khawpui chhung kawng leh inkalpawhna zirchiangtu tur mithiam Mott MacDonald Private Ltd. Noida India chu cheng vaibelchhe 32.8 in rawih an ni. Consultant-te nen hian Mizoram sawrkarin 2021 December 8 khan inremna siam a ni a, an ni hian 2022 January 18 khan hna tanin Aizawl an thutchilh mek a ni.
ADB Mission team nen hian Zirtawpni khan UD&PA secretary Lalmalsawma Pachuau hoa thukhawmin endikna hi khar a ni a. Mission team hian PRF hmanga hnathawh hrang hrang a hmuna an endiknaah sawrkar hmalakna lawmawm an tih thu an sawi. ASUTP hi a hlawhtlin ngei an duhin an beisei tih an sawi bawk.
ASUTP hnuaia ruahman tum:
# Sihhmuiah bus leh maxi cab terminal leh city bus depot
# Sairangah truck terminal
# Hunthar Vengah ropeway station
# MZU – Tanhril – Solomon Temple– CMO – Ramhlun inkarah ropeway
# Bung Banglaah truck terminal
# Lengpui to Chaltlang (km.29.9) ah e-bus tlantir
# Mission Veng to Salem Veng to RG Stadium inkara skywalk siam
# Kulikawn to Bawngkawn leh Temple Square to Vaivakawn inkar kawng pengthuam tih zauh leh siamrem
# Vaivakawn to Zarkawt inkar kalpawhna ruahman
# Berawtlang, Zemabawk leh Bung Banglaah city bus depot leh terminal
# MINECO leh Ebenezer inkar ropeway