China hmalakna zirchiangtuten Mizoram ramri dep rawn tlawh

Larsap Gen. Vijay Kumar Singh (Retd) chuan India hmarchhak state tlawha lokal, sawrkar laipui Ministry of External Affairs-a Centre for Contemporary China Studies (CCCS) Multi- disciplinary Team chu Thawhlehni khan Lok Bhavan-ah a kawm.
Larsap chuan CCCS chu hna pawimawh tak thawktu an ni, tiin, an kalsual lohnan khawtual dinhmun leh ngaihdan zirchiang hmasa turin a chah. Mipui hriatchian hmasak chu thutlukna dik siam kawnga pawimawh a ni tih a sawi a. Mizoram chu agriculture-a innghat leh chhiah lakluh tlemna a ni, tiin, state thang mek, hmasawnna ruhrel din mekna a ni a. Hmasawnna pawh chak taka kalpui mek a ni tih a sawi.
Mizoram chu khawtlang inkaihhruaina nei tha tak, India rama state ralmuang ber zing ami, hnam bil inkara inepna liantham awm lohna, politic ngelnghet tak awmna a ni tih a sawi a. Inkalpawhnaah liantham zawka thlunzawm zel niin, hei hian India hmarchhak hmelhmang a thlak danglam dawn a. Sawrkar laipui scheme – Vibrant Villages Programme hmangin hmarchhak state ramri dep khuate tihhmasawn tumna chuan hmasawnna a thlen dawn tih a sawi bawk.
CCCS Team hi Ministry of External Affairs joint secretary Aparna Ray chuan hoin ni hnih cham turin Thawhtanni khan Mizoram an lo thleng a. Larsap hnenah hian an thil hmuh leh hriatte an hrilh a, zawhna an neih an zawt a ni.
Centre for Contemporary China Studies hi Ministry of External Affairs thluak bur pawimawh niin, China dinhmun leh hmalakna zirchiang a, a tul anga sawrkar department hrang hrang hnena hmalak dan tur kawhhmuha thurawn petu a ni.
CCCS hnuaia thiamna hrang hrang nei member 12 awmna Multi-disciplinary Team chuan March 9-18 chhung hian hmarchhak state an tlawh kual a. Indo-Myanmar ramri dep tlawhin thil nih dan an zirchiang a, khawtual mi leh district thuneitute kawmin thil awm dan an zir thin a ni.