Aizawl khawchhung kawngpui…
PWD minister Pu Vanlalhlana’n thla thar ‘October ni 30 atangin Aizawl khawpui kawng siam that hna tan a ni dawn’ tiin a sawi a. ‘Kawngpui pawimawh laia hman tur phei chu Silchar lung tha lak luh kan tum; kawngpui hi bituminous concrete a ni dawn’ a ti bawk.
A lawmawm hle; hetiang ri han hriat leh te hi! Kawngpuiah hian Mizoram hi kan vanduai a, kawngpui kan neih tlem tehreng nen hian, tha alawi hi a awm lo lehzel a. ‘Fur khat daih lo’ tih tawngkam a lo chhuah phah lehnghal!
India ram kawngpui density ‘national average’ hi square Km 100 bialah kawngpui Km 116-a thui awm zel ang a nih laiin, Mizoramah chuan Km 100 bial chhungah kawngpui Km 46.37 chauh a awm a. A awm chhun lah hi kawngpui bul hnai khua ten hnatlanga an thawm that loh leh, lirthei neitu leh khalhtu pawl hrang hrangten hnatlangin an thawk mup mup reng bawk a. Sawrkar zawk hi, civil mite kawngpui siama hnatlang thingpui lumtu-ah a tang zawk em maw ni tih turin a chang chuan kan awm thin a nih hi!
Tuna Aizawl khawpui chhung kawngpui, a chhe zual lai chul mam hna pawh hi a quality a tha lo hle a; ‘October ni 30’ tinzawn hian tha rei vak lo turin an hnawm kual vel mai mai em maw ni tih mai tur lah ni!
Kawngpui a that rei theih loh chhanah ‘lung chang tha tawk lo’ chhuanlam a ni thin hi a dikna chin chu a awm ang; Mizoram lung hi a lo chang lo viau mai a, tuna rel kawnga an lung nawi (rawra) phah te hi sailungvar ang maia chang tha a ni hlawm a, rel kawng phah hnan atan Mizoram lung hi chu han hman chi ziazang a lo ni lo. Motor kawngpui atan pawh a tha rei lovang tih chu a hriat mai.
Mahse, Mizoram lung hmanga siam kawngpui theuh theuh pawh, a inthat rei hleih hlawm viau thin tho. Kaawngpui siam dan dika siam chu, a lung lo chang tha lo deuh pawh ni se, repair ngai lovin kum tam tak a zawh theih; a siam dan tha lo leh fuh lo chu, ‘lung chang tha pawh hmang se, ‘fur khat daih lo’ an ni zel tho.
Chuvangin, hmanraw tha deuh pawh hmang i la, a siam dan lam kan uluk leh si loh chuan awmzia a awm dawn lo va, Silchar lung chang te pawh chu lo hmang pawh ni ila, hnathawh laia vil uluk kha a pawimawh ber tur chu a ni tho tho awm e.
Aizawl khawpui chhung kawngpui rau rauah pawh, Silchar lung chang hmang lova siam, rei tak tha thei a awm a, tuna Bawngkawn leh Zemabawk inkar kawngpui te pawh, a siam dan a fuh chuan thawm that ngai lovin nuam takin rei tak a hman theih a nih hi. Vil uluk a pawimawh!