Aizawl khawlai a fai deuh deuh
Kum a thar a, Aizawl khawlaia ruihhlo sulhnu a fai deuh kuar. January thla chawhnu lam a ni tawh a, kum thar tir aiin a fai niin a lang.
Aizawl khawlaiah hian ruihhlo leh a sulhnu a langsar thin a, hmun lun ber berah pawh duh tawkin ruihhlo an zuarin an lei thin a ni ber. Chhun engah pawh ruihhlo khawih lai, hmuhnawm loh fe fe hmuh tur a awm thin a, kum tharah chuan a zia ta rih.
Vanapa Hall bul vel hi ruihhlo zawrhna hmun a ni thin a, ruih nghal theihna hmun pawh a ni thin. Chhun pachangah pawh ruihhlo leh a sulhnu a langsar thin e, mi dang tana kal ve inthlahrunawm khawp a ni thin. Kum tharah chuan a fai rih.
Zodin vel te, Treasury Square te, Canteen kual te pawh a zia rih a, Aijal Club Park leh Aizawl Lei vel te pawh a zia. Hmun dang pawh a zia a, a fai ve deuh kuar rih.
“Tunlai chuan a zia khawp mai, YMA lam an tang a, a hma ang luih luih kha a ni lo a, damdawi khawih an vang ta deuh,” Treasury Square-a ‘hawker’ pakhat chuan a ti.
Aizawl khawlai hi a fel fai thlap tawh tihna chu a ni lo a, a hma ang kha a ni ta lo tihna a ni ber. Vanapa Hall bul velah pawh ruihhlo leh a sulhnu hmuh tur a awm tawh miah lo a ni lo a, mahse a hma ang luih luih kha a ni tawh lo, hmuh tur chu a la awm zeuh zeuh, a bul vela chetlate sawi danin.
Central YMA-in ruihhlo do kum an puang mek a, December thla tawp lam atang khan Aizawl hmun lun lai hi a theih ang angin YMA-in an thian mek. Khawlaia ruihhlo khawih thin mi engemaw zat an khawm a, home lama dah pawh an nei nual tawh.
Central YMA office atanga thu dawn danin, kum hlui December ni 24 atanga kum thar January ni 17 thleng khan khawlaia ruihhlo buaipui an hmuh mi 200 chuang an khawm tawh; an chhinchhiah danin January ni 13 thleng khan mi 192 an khawm a, ni 13 leh ni 17 inkarah mi 10 an khawm leh.
An mi khawmte hi an kawm a, engemaw zat chu home-ah an dah tih sawi.
Zirtawp zanah hian Central YMA hian khawpui chhunga branch hruaitute nena inrawn khawmna hun buatsaih an tum a, ruihhlo do dan tur sawi ho an tum. January ni 20-ah Central YMA hnuaia ruihhlo do pawl CADS (Central Anti Drug Squad) member tharte’n an thawk tan bawk.
Centrak YMA hruaitute chuan ruihhlo do hna hi theihtawp chhuahin mi thahnemngaite’n an thawk mek tih an sawi a, branch-te’n mahni huam chhungah an thawk bawk a, khawlai pawh a fai phah tih an sawi. Mahse tan mar pat a ngaih thu an sawi a, mipui tanrual a ngaih thu te, khawlai a lo fai ta deuh pawh lawmawm an tih thu te an sawi.