Aizawl leh a chhehvel veng endik mek

Aizawl leh a chhehvel veng endik mek
UD&PA department, Aizawl Smart City Ltd, Aizawl Municipal Corporation leh Central YMA hmalaknaa Aizawl leh a chhehvela YMA branch/ veng fai inelna kalmekah Inrinni khan endiktute chuan endik hna an thawk tan.
Central YMA-in direct-a a enkawl YMA branch-te faina kawnga inelna hi kumin March 31 khan UD&PA minister K Sapdanga’n a lo hawng tawh a, hemi ni hian Aizawla veng hrang hrangah hnatlangpui huaihawt nghal a ni. Kumin June khan a khuhhawnna hun neih a ni leh bawk.
Faina kawnga intihsiak endiktu panel of judges hi – Save The Riparian hotu Romalsawma, environmental science-a research scholar Gospel Lallawmzuali leh MJA general secretary K Zothanpara te an ni a. September 6 zing kar khan endik tanin, Aizawl hmar lam atangin an tan a ni.
Endik thawhkhatna hi kumin September atanga November thla chhungin neih a ni dawn a, kumthar, 2026 tir lamah endik thawh hnihna an nei leh ang.
Inelnaah hian AMC huamchhunga YMA branch zawng zawng bakah Aizawl hnaivaia khua leh veng thenkhat an tel a, an vaiin YMA branch 109 an ni.
Ruahman dan chuan, kum 2026 Chapchar Kutah result puana lawmman sem tum a ni a. YMA branch fai berin cheng nuai 3, pahnihnain nuai 2, pathumnain nuai 1 an dawng dawn a; endik thawhkhatna atanga thawhhnihnaa hmasawn zualte hnenah lawmman hlan tum a ni bawk.