Aizawl leh Lunglei ngawr ngawr…?

Mizoram Legislative Assembly Session kal mekah nimin khan “The Mizoram State University(Amendment Bill) 2026” chu pawm a ni a. He Bill hian ngaihven a hlawh a, Bill sawi honaah pawh thawm a tha hle. A Bill neitu minister Dr. Vanlalthlana chhut danin bill sawi thei tur member 38 zingah member 26-in an sawi a, chu chu 68% a ni.
State University Bill hi nikum lamah House-ah put luh lo ni tawhin, State University hmunpui (headquarter) awmna tur ‘Aizawl’ tih chu pawm fel vek a ni tawh a. Hei hi State University Demand Committee Lunglei nawrna avang te pawh a nih a rinawm a, tun tuma amendment bill put luhah hian State University hmunpui hi ‘Lunglei’ tih a ni leh ta a. Nimina Legislator-ten an sawi rik tam pakhat pawh ‘Aizawl’ tih leh ‘Lunglei’ tih chu a ni ta awm e.
Tunhma atang tawhin ‘chhim lam’ tih leh ‘hmar lam’ tih hi leklam a lo ni tawh a, tun hnuah hian ‘Aizawl’ tih leh ‘Lunglei’ tih hian a thlak ta deuh niin a lang. Thil awmna hmun sawi chian nan chhim, hmar, chhak leh thlang tihte hi sawi a ngai thin a, chu chu khawvel kalphung a ni. Chutih lai erawh chuan, Mizoramah hian ‘chhim lam’ tih leh ‘hmar lam’ tih hi a hmun sawifiahna ni mai lovin ‘inthliarna’ anga ngaih theihin hman a ni ta fo mai a, hei hian rilru dik lo leh hrisel lo, ‘in-elna’ ni lova ‘in-erna’ a ken tel theih avangin chawh bo a hun ta hle. Chumi harsatna sut kian nana pawimawh pakhat chu, hmasawnna khairual thlentir hi a ni.
Nimina he bill sawi honaa Thorang bialtu MLA Rohmingliana’n chhim lama state university hmunpui dah a ni tur chu hmasawnna inkhairual (equitable regional development) a awm theihna atan a tha tia sawiin, hmun kilkhawr zawk Thorang bial emaw West Tuipui bial emaw-ah te hian cluster college te pawh awm ve nghe nghe se…tia a sawi kha awmze nei (valid) tak niin a lang a. ‘Mizoram MLA ka ni a, Thorang bialtu ka ni’ a tih khan awmze ril tak a nei bawk. Lunglei MLA tih emaw, Aizawl MLA tih emaw, Champhai MLA etc. tia MLA rual intelkhawm bik boruak a awm a nih chuan, chu chuan inthliarna emaw, inlak bingna boruak tha lo tak a hring chhuak ang tih a hlauhawm hle a ni.
Mizoram hi ram zim tê a ni na a, ram zau taka awm ang maiin kan inhlat em em hlawm vek mai a; hei hi a chhan chu inkalpawhna kawngpui tha a awm loh vang a ni. Awmna inhlatna hian indaidanna a siam a, hmasawnna tur a dal nasa hle. Mizoram chhim tawp leh hmar tawp, chhak leh thlang tawp te hi inkalpawhna kawngpui tha se chuan, nikhat thilthua lehlan theihna tham lek a ni. Inkalpawhna tha se chuan, khawi hmunah pawh eng pawh awm se, kan huphurh ngai lovang.
Mizorama NIT din a nih dawn pawh khan Thenzawl khawtlang chuan ram an pe a, a hmun pawh a rem khawp mai; mahse, national institution din dawna criteria kha ngaihtuah tel a ngai a. State hrang hrang atanga visiting professor lokalte tan ‘airport atanga darkar hnih chhunga thlen phakna hmun’ tihte kha a tel avangin, Lengpui airport leh Thenzawl inkar inkalpawhna a that loh avangin, hmun rem em em Thenzawlah NIT din theih a nih loh phah tawh a nih kha.
House boruak ve thung: Roreltuten political advantage lak nana thil an kalpui lutuk a nih chuan, in-auh buaina a thleng vat thin a, chu chuan House chhung zahawmna a tibawrhbang a, tawngkam mawi lo leh thu dengkhawng tak takin a zui a, parliamentary decorum sang ber nihna level hi a hniam sat sat zel. Budget pharh a han ni ang a, budget discussion neih hunah pawh, tunge budget aia political advantage ngai pawimawh zawk tih chu mipuiin an lo thliar leh ngei dawn a. Mizoram budget sawi laia mahni bial chhung khawi lai emawa culvert leh lungrem etc. tih vel lo phulpui leh hlut an awm thin hi mipui hian an hrethiam thin lo tihte pawh hi hriat ve mai mai atan a tha awm e.