Aizawl traffic felfai vanga award dawn lawmna atan bus fare chanve

Aizawl traffic felfai vanga award
dawn lawmna atan bus fare chanve
Mizoram-in Traffic Management System chungchangah ‘Special Award’ a dawn lawmna atan UD&PA department chuan vawiin – November 21 hian Aizawla City Bus service-a chuangte tan an chuan man zat tur man chanve zela chuan theihin a ruahman.
UD&PA minister K Sapdanga chuan, award an dawn hi mipui vang a ni a, a lawmna atan mipui hnenah sawrkarin pek let ve a duh a, City Bus chuan man hi a thlawn veka tih an duh viau rualin, a man chanvea chuan theiha ruahman a ni ta zawk tih a sawi a. “Kam zavaia thawh rah a ni a, he award hi mipui dawn a ni,” a ti.
Sawrkar laipuia Ministry of Housing and Urban Affairs chuan kumtina a buatsaih thin – Urban Mobility India Conference-ah Mizoram hi Aizawl khawpuia traffic inkaihhruai dan felfai tak avang hian special award a hlan a. UD&PA hotute chuan, he award hi elpui dang state awm loa pek an ni a, an zuk insawiluh pawh niloin ministry zawk hian a rawn hriatpuina a ni a, sumfai a kengtel lo tih an sawi.
City Bus chuan man chungchangah Aizawl City Bus Owners Association nen inbia in, ni khata an lakluh tlangpui atanga chhutin, bus neitute lam hian award lawmna atan tlema hniam ve hretin an inremsiam tih an sawi.
Hetihrual hian traffic fel tak nei tura an thawh hlawknaah Traffic Police-te chunga lawmthu sawina atan vawiin vek hian UD&PA hian chaw chhun a buatsaih sak dawn a ni.