Aizawl Traffic Jam fo mawlh mai hi

R.Lalrinkima
Hidden Lodge
Chanmari, A izawl
‘E khai, eng vanga khatiang nena lo tlai leng lut nge maw i nih le?’ tih chul pah chuan a thil rawn khai chu ka lo lak sak thuai a. ‘E, engmah ni lo mah se, hun kha leh chen sawrkar tan rinawm leh taima takin i pension thleng hna i thawk a, ka lawmpui em che a, kan arpui tuilai ka rawn khai lut a ni e” nui hak hak pah chuan a ti chul a.
|huthmun a rem fel sauh sauh a, “Nimin chu inneihna hmang turin ka chhuak a, eng lirthei mah nei ve ta lo chu khua a nuam vak lo nen ke pali nei taxi-in ka kal a. Tunlai tak hi ka chhuakvak tlem hle mai a, kan in atanga inneihna hmun thleng thei tawk tura ka ngaihah chuan ka chhuak kha a ni a. E khaih khaih, heti khawp hian a ni maw Aizawl khawpui chhunga lirthei veivak hi an lo tam ni? ka ti vawng vawng a”. Ni e, thuneituten heng hi an hriat vang alawm lirthei registration number tawpa 1,2,3,4,5,6,7,8,9,0 te awm dan azirin intlanchhawk ni te an siam ka ti a. “ Lirthei nei ve ta lo leh thil chinchang hre zau lo keini upa lam chuan kan hre ve hauh hleinem” a ti zui a. Nimahsela neinung deuh te chuan lirthei an ngah a, pakhat tlan ni loah a dang tlanna tur an nei a, lirthei intlanchhawk tih angah hian an buai lo a, hei vang hian traffic jam tihnep nana motor registration number tawpa number hmanga intlanchhawk an tih hian kori a tu lem lo tih ka hrilh a. “A ni thei awm teh tak e a, ngawi teh PAHOSS an tih te kha engtak hi nge maw ni le?” tiin min zawt a. PAHAUSASUMSIAMNA a ni ber awm e, lirthei pakhat dah theihna atan sawrkar khan cheng nuaih khat a phalrai a, cheng nuaih za man chuang motor dah theihna tur In sak tir te kha a nei a. Aizawlah hian motor dahna In (Garrage)-a motor za chuang inhunna han zawng mah teh, i hmu hauh lo ang tiin PAHOSS hlawhchhamzia chu ka fah ta zek a.
“A, duhtawk tawh teh ang, Aizawl khawpui traffic jam nasat em em na chhan hi i ngaihdan min han hrilh teh, inneihna inkhawm chanve hnu lam ka tel a, haw lamah lah chhungte ngaihtuah ngai khawpin ka haw tlai bawk a?” a la ti fan a, tihian ka han hrilhfiah ta a(ka ngaihdan mawlmang tak chu).
Ngun takin lo ngaithla ang che aw, sawrkar nge, Local Council hotute nge lirthei lei tum te thiam loh? tih hi zawhna lian tak a ni. Sawrkar khan huntiam chhung fel tak siamin chu hun tiam a pelh hnua lirthei lei tur te chuan an lirthei dahna tur Garrage an neih ngei a ngai tawh a, lirthei dahna tur an nei ngei tih Local Council lam hriatpuina lehkha chu Transport Department lama mawhphurhna nei te chuan a hmunah finfiahin lirthei dahna tur chu lirthei lei tur chuan an nei ngei tih an hmuh hnuah lirthei lei phalna chu pek an ni ta a. Nimahsela, hei hi thu tisaa chantirah chuan a vanduai thlak ber awm e, lirthei lei turin dawt sawi bawk, Local Council lamin an garrage hman tur chu a tak tak a ni em, ni ta se chu Garrage ah chuan lirthei eng zat nge dah a nih tawh tih enfiah awm hek lo, lehkha ah chuan khunkhan takin hming an lo sign kualkawi ve niai a. Transport lam thuneitute lah indaih lohna vangin chu lehkha chu finfiah lem loin ‘ka finfiah ngei e’ tih an lo ziak thin nge ni heti zozai zan lama kawngpui sira lirthei eng chi pawh an chap zel zul ni? Tichuan, khua a lo var a, an tlanchhuak leh sung sung a, lirthei lei tura tihmakmawh ti hauh lo chawlhni kristiante chuan traffic hi kan ti jam ka reng mai a ni berin ka hria ka ti a. “A ni thei dawn khawp mai, lirthei tlanloh Ni nei thei miah loa lirthei ngah te, garrage nei hauh si loa zan lama a rem rema lirthei riah mai mai te chu traffic ti-jam-tu chu an nih ngei dawn chu,” a ti boh boh a.
Chu mai bakah. Mizote inelna tha lo tak, lirthei nei nih duh tlatna hian Bank lam pawh a ti lungleng a, lirthei nei duh tan sumhmahruai awm lem lo pawha Motor/lirthei loan pek chu an chak ta a. Bank mai pawh ni lo, lirthei zuartute pawhin lirthei lei duh ten an lei duh tak lei theih nan sumhmahruai tlemte nena thla tin rulh theih dan tur an lo phochhuak ve bawk si. Mahni lirthei tui man thawk chhuak hauh lo te hi khawlaiah a tlan tam tam an ni leh bawk te hian kan khawpui traffic jam chhanah chuan tel vena chin an nei ngei ang tih a rin theih ka ti a. “A nih, chutianga ngaihdan te i neih nual chuan chawplehchilha traffic jam tihnepna tura ngaihtuahna i neih ka ring tlat, min han hrilh teh?” a la ti ta zel a. Ni e, hman deuhah khan Transport Department leh Lengzem chanchinbu te tangkawp khan Aizawl khawpui traffic jam tihziawm dan thuziak intihsiak an huaihawt a, kei pawhin ka ngaihdan ka theh lut ve a. Keia ngaihdan mawl takah kha chuan tun maia hman tangkai theih lam kha ka lo thlur bing chiam a, kha thu inziahsiak huaihawttute kha chuan kum 10 hnu lam kan tih dan tur thuziak lam kha an duh dan a lo ni si emawni dawn ni pakhatna latu chu MZU lama Bachelor of Civil Engineering zirnaa Transportation Engineering lam zirtirtu Assistant Professor lai a ni a, kei mimawl tih takah kha thuziak kha hman a nih theih dan tur ka suangtuah pha awzawng lo a. Tun ang hun laia kan traffic jam tih ziaawm nana ka ngaihtuahnaa awm te chu:-
Peak hour lai, sikul naupang lirtheia hruai tam hun lai, pisa kal hunin a zawm leh tlai lam pisa ban chhoh vel lai hian 2-way kawngpui thenkhat, entirnan- Governor Complex chhimlam Gate atanga Kulikawn thleng hi motor opposite direction-a kalte awlsam taka inpel thei mai tibuai tur hian motor karah 2-Wheeler te hi inhnawh/zeh phal loh ni se la. Chutiang bawkin Sikulpuikawn City Bus stand atanga hmar lam (Upper Khatla road leh Peter Street chhuk thla kaltlang) atanga Axis Bank Office, Chanmari thleng hi khap ni bawk se la, Aizawl khawchhung traffic jam zualpui hi chu a ziaawm ngei ang.
A chunga ka sawi ang khian Lirthei nei tur ten Garrage an nei ngei tur a ni tih thupekin a huam china lirthei neite zawnchhuah hna hi sawrkar hian nei se la. Hei hi thil har a ni lo, District Transport Office atangin garage neih ngei ngaih hnua registration ti lirtheite chu a neitu hming leh veng chiang takin an hre vek a. Department lamin staff indaih lohna chhuanlam tawh loin Local Council lam thuneitute nen endik hun tur insiamin finfiah ho se la, garrage nei loa lirthei nei lui te chu Registration no tawpa number mila tlan theih loh hun bituk hun chhungah tlanchhuah phal loh an ni tih thupek khawng tak pe se.
Veng thenkhat, khawpui kawngpui dung fintu kawng sirah lirthei insulpel tur inpelh awlsam nan kawngpui sira luikawr chung RCC slab a khuh chunga 2-wheeler dah nileng deuhthaw thin hi vai ni se, dah tawh lo tura hriattir ni se. Heng luikawr chung khuhna hmunte hi khawpui kawngpui kam ni lo mahse kawngpui atanga heng kawngtea lirthei kal tur an dal avangin kawngpui dungah a nghawng chho thin tih hi a chiang. Entirnan:- Chanmari to Vaivakawn&Edenthar via Chanmari West kawng sira 2-wheeler chhun lama ding thinte atang hian a chiang viau awm e.
“I han sawi takah chuan a dik hmel viau mai, ka han belh hlek duh chu, Taxi-a eizawngte tana kar khata an tlan theih hun chhung tur nikhata tih tam sak chinah hian tunhnaiah traffic jam a siam nasain ka hria? An tlan hun tur an bithliah sak pawha a jam nasat tawh nak alaiin an tlan theih ni an han tihtam sak hi chu ngaihtuahna mawl tak niin ka hria” tih pahin a thingpui in bang chu a in zo khulh a.
Eng pawh ni se, heng kan sawi hi chu thuneitute bengrawngah a lut lo mai thei nain ngaihtuahna a siamsak beiseiin i lo thlir phawt mai ang hmiang ka ti a, zanriah ei a hun ta a, a ding hluai a. “Hmanniah Pawlrangah ka tu leh fate tlawhin ka han zin a, Pawlrang khaw leilet pui ber,Tuiphal kama mi khu tuikhuah nan tun sawrkar hian hman a tum niawmin an lo sawi a. Electric Minister pawhin Engineer tirin Leilet neituho a han biak tir niawm a nia. Pawlrang khawho lah chuan sawrkar lam atanga lehkha a ken leh ken loh Engineer chu an zawt a, ken engmah a nei si lo a, an leilet lah tuan leh mang ata an dam khawchhuahna atan an rinrawl ber a ni a, chuti maia tuikhuahin a chim chhiat tur chu an phal awzawng hlawm si lo a. Hemi chungchang hi lo thlithlai la, i la sawi dun teh ang, leilet/tuikhuahna tur panna kawng cheithatna tur pawh cheng nuaih sawmhnih chuang ruahhmanna a awm tawh tih an lo sawi te hi a finfiahna ka lo ngaihtuah bawk ang e, chawei tui le,” tih pah chuan a chhuak zui ta a.