Aizawl tui tlan la pump thei lo Tui sem hun tur la sawi thei lo

PHE department chuan Tunhnai ruahsur nasa avanga tuilian leh tui nu nasa avangin Aizawl chawmtu Greater Aizawl Water Supply Scheme (GAWSS) Phase – I & II chu May 30 atanga June 3 thlengin tui pump theih a ni lo a. Power transformer lam that loh avangin GAWSS-III Setlak chu May 26 atangin tui pump theih a ni lo tih an sawi. Hetihlai hian Vaivakawn -Zohnuai lei tlakhniamnaah GAWSS-III tui pump-na pipe atangin June 2 khan nasa takin tui a chhuak a. Tui pump loh lai a nih avangin hetianga tui chhuak vak hi a chhan hriatthiam har an tih thu department hotute hian an sawi a. Helaia cheng mipui an ralkhel hle tih an hriatin pawi an tih thu an sawi a ni.
May 30 khan Zemabawk South (NH 54) kawngchhak lam inhmun laihnaa nasa taka leiminin, a chhaka Beraw Tlang panna kawng hrula kal Assam Rifles leh Lungbial mipui tui pekna pipe line a hnawl chhia tih sawiin, tun thlengin tui pek theih a la ni lo a, pipe line siamthat hna ngawrh taka thawh mek a ni tih an sawi.
Hmun hrang hranga khuarel chhiatna thleng avang hian khawpui chhung tui semna (distribution line) lamah chhiatna nasa tak an tawk mek bawk tih sawiin, chhan hrang hrang avanga tui sem mumal theih a nih loh bakah khaw chin leh tui dinhmun thlirin pangngai taka tui sem leh theih hun tur chiang taka sawi theih a ni lo tih an sawi a ni.
‘Mipui hriatthiamna kan dil a, ruahtui dahkhawl lamah tan lo la zel a, PHE department min tawiawm turin kan ngen a ni,’ an thuchhuak chuan a ti.