Aizawl tui tlanah septic tank thli

Save the Riparian tih hming puin mi thahnemngaiten Aizawl tui tlan Tlawng lui tihfai an tum a, an hmuhchhuah chu, luiah septic tank thli a lo lut nasa tih a ni.
Tlawng lui tihfai hmain March ni 26 atanga April ni 20 thleng khan Aizawl khawpuia lui/lui kawr, Tlawnga luang lut an thian hmasa a, heng lui kawrah hian septic tank thli a lo lut thin tih an hmuchhuak. May ni 1-ah a thawh hnihna an tan leh a, an tan chauh a, an hmuhchhuah chu a ngai bawk!
Save the Riparian hruaitute sawi danin, a thawh hnihnaah hian chhungkaw thenkhatin luiah septic tank thli an lo luhtir tih an hmu nghal a, thuneitu lamin an bawhzui nghal a ni.
A thawh khatnaah pawh, a thawh hnihnaah pawh septic tank thli, luia luhtir hi chi hnih an awm a, a khur pawh siam lova ‘direct’-a luhtir leh a khur atanga luhtir an awm.
Lui thiana an hnatlan hma hian a hmunah kalin an en hmasa a, septic tank thli luan luhtir hi an awm nual tih an hre sa a ni. A thawh leh turah pawh hetiang hi a la tam dawn tih an sawi.
Local Council leh YMA lamin a theih ang angin an bawhzui a, AMC-in a thawh khatnaa hmuhchhuahte kha luia luan luhtir tawh lo turin an hrilh bawk.
“Bawlhhlawh kan paih duhdah a, septic tank thli thlengin kan paih a. Chung chu kan tui tlan Tlawngah a luang lut a, kan tui in tur hi keimahni ngeiin kan tibawlhhlawh a ni,” tiin frontline leader Roma Hmar chuan a sawi.
“A hma pawhin septic tank thli luiah a luang lut tih hi thuneitute hnenah kan lo thlen tawh thin a, bawhzui a ni tlat lo a. Tunah chuan bawhzui ni ta a, a lawmawm khawp mai,” a ti bawk.
An hmuhchhuah tawhah siamtha an awm a, thuneitu lamin an en zui bawk. Zaa zain an siamtha em tih erawh hriat a ni rih lo.