Aizawla power hmunhma tlawh

Aizawl khawpui chhunga Power & Electricity department hmun pawimawh thenkhat leh hnathawh mek chu July 20 zing khan P&E minister F Rodingliana chuan July 20 zing khan a hmunah a enfiah.
Chite-a 33 kV Sub-Station siam mek enin, chak zawka hna thawh a nih theih dan tur engineer-te leh contractor-te a sawipui a. Kumin September ralhmaa zawh hman tum turin a chah. He sub-station hi NESIDS atanga hmuh niin transformer lian 10 MVA pahnih dah tum a ni. Siam zawh hun chuan tuna Zuangtui (lower) Sub Station (SS), Indoor SS leh Mualpui SS-in a chawm veng tam tak a chhawk zangkhai thei dawn tih sawi a ni.
Zuangtui-a MRT Division chu minister hian tlawhin, store thawmthat dan tur leh transformer chhia siamthatna workshed dinna tur hmunhma a en. He workshed hi tihpuitlin hunah chuan Mizoram hmun hrang hrang atanga transformer chhia dahkhawm a, repair theihte phaia thawn ngai loa repair tum a ni a, hei hian nasa takin sum senso a ti tlem thei dawn a ni. Department bungrua pawh endikin, electric bante chu a size mai piahlamah a rih zawng endik tel thin turin a chah.
Zuangtui SS atanga Bukpui (Serchhip) kaltlanga chhimlama power pekna line tihchangtlun nana CT transformer lian dah dan tur chu F Rodingliana hian a en nghal a. Chhimlam power pekna ber, Melriat SS line a chhiat chang pawha Zuangtui atangin Bukpui kaltlanga Khawiva SS power pek thin chu load shedding ngai loa duh ang thala power pek a nih theih nan transformer lian hi dah tum a ni.
Heng hmalakna leh ruahmanna kal mek hi khaihlak loa power supply kan neih theihna tur a nih bakah thlasik atana inpuahchahna a ni tih minister hian sawiin, hunpui laia power hman zat a san avanga harsatna awm thin pumpelh a nih theih nana ruahmanna siam hi chak taka bawhzui turin engineer-te a chah a ni.