Aizawla Rukru rual chhuah zalentute hian khungkhawm leh tawh rawh se

K. Hmingthankaia
Ni 13 September 2025-a Prime Minister Pu Narendra Modi-a Mizorama a lo kal ni khan security leh official dangte inbuatsaihna kha a that hmel hle mai a. Official hrang hrang leh Security personel zawng zawng, NCC thlengin khawchhe hnuaiah zing tak, a then phei chu khawvar hma daih atangin mahni mawhphurhna tur lam theuhah an inpeih fel hman vek a ni. Khawchhia khan a tibuai pha lo a ni.
Khaw awm danin a zir loh avangin PM khan Aizawl lo thleng thei lovin, Lengpui atangin a tih turte kha fel takin ti ni mah se, kha ti chunga khawi hmunah pawh nilenga kan inpekna leh inbuatsaihna tha taka hlenchhuah a ni kha a ropuiin a tha hrim hrim a ni. Tute tan pawh tih tak zeta rilru senna turte, thu awihna leh discipline vawn that lama intuai thar nante khati ang hun leh boruak danglam kha thleng zeuh zeuh se a tha hrim hrim.
Aizawl chhim lam atanga official-te lammual gate puia lut tur, security check uluk avanga Venghlui Central hall zawn thlenga ruahsur hnuaia intlarte pawh khan hrehawm tih hmel pu miah lovin, an mawhphurhna khan an rilru a kap zawk niin a lang. Ropui tak a ni.
Tin, VVIP te programe reng reng hi ruahmanna pakhat a tlawlh palh pawha ruahmanna dang pahnih pathum fel taka siam vek a ni thin tihte hi hre nawn leh ila, chutiang zawng zawng atana inbuatsaihna chu fel taka tihhlawhtlin vek a ni bawk a ni. A buaipuitu leh mahni mawhphurhna theuh tihlawhtlingtute an fakawm hle a ni. Mipui nawlpuiin kan hriat phak loh thil a tam lutuk dawn si a.
Khami tuk zingkar khan Police thenkhatte nen dawr pakhatah thingpui kan in a. Keiin, “Pu Modi-a lo kal tur chu a lawmawm hle mai. Zingkara hmuh hreawm tak drug adict-ho khawlaia hmuh tur tam lutuk kha an bo duak a, uniform ha hlir kan hmu thung a, a hahdamthlak hle mai,” ka ti a. Pakhat chuan, “An tam si, an zakthei si lo tiraw,” a lo ti a. Keiin, “A chhuah zalentute hian khungkhawm leh tawh se a tha ang,” ka lo ti leh a.
Tu te emawin a him leh nuam chin atanga, ‘Drug addict-te hi hnawk tih leh huat ena en lovin, khawngaih leh hmangaih ena en tur’ lo ti thla ve zen ho hian, an bulah zak miah lovin dawt sawi fo se, an thil ru fo se emaw, an chhehvel leh hmuh theihah tam hle se, hmuh hrehawm leh inven reng ngaiin awm ve ta se, hmangaih ena en hleuh hleuhin chawte hi an pe reng peih ang em le. Kei chuan ka ring lo. Kei phei chuan ka thei lo lehzual ang.
Tunhnai atang khan tuk tin Police Lock-up report ngaithla ila, rukru an tam ber zel. Chung rukru ho chu addict an ni deuh zel bawk. Ruk hreh leh ruk theih loh pawh an nei lo. Ruk awma ngaih loh thleng thleng hian an ru zel a, ruk tur ringawt men hian an meng a ni. Khawtlang nun chu tihrehawm tak an ni.
Hetiang ho, ka tan a, ka hmangaih te lo tiho hian, an hmangaih tak tak chuan enkawl se, veng se, an ruk ru turte hi an ven loh vek leh, ruk ruk ngai lovin an damdawi man tur chu pe mai se. Ruk ru lo mah se, khawlaia an tam lutuk hi hmuh an hreawm hrim hrim.
Hetiang ho mi hahthlak lutuk, hmuh hreawm lutuk leh chimawm lutuk ho, chhungkua leh khawtlang titawp lutuktute thianfaitu leh lo khungkhawm boa lo enkawl peih an awm te chuan lawm lutuk tur kan nih lai a, lo intihfin bik a, lo intihfel danglam bik tum leh lar lo khelh vel vang niawm taka heng mi hnawksakho lama lo tana, an thlavang lo hauhsaka, tu tute emaw dem kuala, heng mi chimawm ho ti-huangtaua rukru rualho chhuah zalentute khan min khungkhawmsak leh tawh mai rawh u. Nangni pawhin in ngaihsak zui theih tak tak hmel si loh va. Khawtlang nun an tichep em mai..
Doctor-ten hriau thianghlim tereuhtea damdawi dika vawikhat min vih dawn pawha kan hlauh viau laiin, damdawi hlauhawm tak tak an kawchhunga thun reng leh hriau bal deuha an thisena thun rengtute hi an dam reng thei zawk hi mak ka ti thin. Hnawksak rau raua hnawksak lo deuh zawk zu chhe intute an thih zung zung laiin, drug addict ho hian an daih rei zawk tlat niin a lang.
Tunhma khan khawlaia zu rui leh zu keng leh hralhte kha an man thin khan ka hria a, ‘Khawlaia ruih phal loh, man theih’ tih hian zu chauh em ni a huam le? Khawlaiah hian drug rui leh keng leh zuarte hi zalen takin an awm suau suau ta mai si a.
Hengho man ringawt dan a awm lo. Man pawh ni ila khungkhawmna tur a awm lo, tih rite kan hre thul. A sawimawi duh leh tantute lah chuan, hengho hi an tam lutuk lo, an langsar mai mai alawm, an lo ti bawk a. An tam loh chuan Jail-ah khung zel mai awm. A enkawltute ber kan tithinrim tawh si a.
Miin zu hi chu in mah se, in loh hun a nei mai thin. Drug addict hi chuan an sim mai mai tawh lo. Chuvangin, siam that tum hian awmzia a nei tlem khawp. Khungbo hi a hahdamthlak mai ka ti. A la ti ve lote theihtawpa ven hi a fin thlak berin ka hria. Hman atang leh hmanni deuh lawk atanga kan ven lohte kha tuna addict-te hi an ni. Chuvangin, TBCC te hi tihlungawi leh dante hi zawng ila, a nih loh pawhin OKM te khu inbiakna neihpuiin hengho khungkhawm nan hian hmang ila, hengho hmangaihtute emaw, sawrkar emaw hian zuk chawm pui mai se.
Hmun ralmuang leh nuam leh him atangin emaw, kan khawsak nawm lai leh kan hrisel that lai, malsawmna hrang hrang kan dawn lai, kan thawven laite hi chuan, mahni pawhin kan tih theih tak tak tur ni hauh lo hi mi tih atan leh mi chunga thleng atan chuan intifing leh intihria, intifel takin nuam ti tak hian kan sawi leh mai thin a. Thlamuang taka awm tur te, beidawng lo tur te, retheih leh mangan leh natna khirh neih pawha hlim leh lawm tlat tur te, Pathian laka vui lova lawmthu sawi zawk turte, engkim chhel taka tuar tur te, ti fan fan tur te, engkima rinawm tur te, duham lo leh mahni hmasial lova tlawm taka nung tur te, midang leh misualte hmangaih tlat turte hian awlsam tak hian kan sawi leh mai thin a. Kan chunga thil lo thlen dan azir hian a sawitu ngei pawh hian kan ti thei ngut ang em le. Khitiang thilte khi kei phei chuan sawi ka hrat, mahse, ka tih theih loh vekte an ni. Drug addict hmangaih leh khawngaih phei chu ka thei lo lehzual. Khawngaih thla an la hlawl lo ka ti a ni.
Nge, ti hian mi chi tin hi kan inpawlhsawp chho zel ang a, vairam anga nun tawp leh hahthlak nun hi entawn zelin, misual, mi chimawm leh rukru ho nena khawsak dan te hi kan zir chho zel zawk mai dawn em ni?