Aizawlah B20 meeting nei Sumdawn ho dan tur rel

Group of Twenties ram leh sawmbik dangte telna B-20 Meeting chu Ningani khan Aizawlah neih a ni a. Sumdawnna kawnga thawh ho na tur leh ram economy siamthatna tura tulte sawikhawm a ni.
Meeting hawnnaah hian Union External Affairs minister Dr RK Ranjan Singh chuan Mizoram chu literacy rate sang tak, Sap tawng hmang thei tamna, thalai lehkhathiam an tam avangin hengte hi sumdawnna kawngah tangkaina tam tak nei a ni tih a sawi a. India economy chu hun reilote ah khawvel huap pawha a sang 5 zinga a tel thu leh a bikin thawhhona hmanga sumdawnna din kawngah hma a lak nasat thu te a sawi. India hmarchhak state-te chu Asia chhimchhak ramte nen inlaichinna leh insumdawn tawnna atan pawimawh tak a ni tih a sawi bawk.
India hmarchhak chu ram economy than zelna atan hmun pawimawh leh theihna nei a ni tiin, B20 Meeting hian khawpui dangte nen insumdawn tawnna a siamsak anga, chu kawngka chu mite ber thleng pawhin hawnsak a ni dawn tih a sawi a ni.
Minister of state for Commerce & Industries Som Parkash chuan India-in sumfai telloa insumdawn tawnna kawnga thang ber pawl ram a ni tiin, hmarchhak state dangte ang bawkin Mizoram chu investment tihna hmun tha tak a nih thu a sawi a. Industry hrang hrangah hmarchhak state-te chu hmasawnna ruhrel hrang hrang din a tihchangtlun hna sawrkar laipui chuan a thawh thu te, a bikin National Bamboo Mission kaltlanga mau hmanga economy tihhmasawn hna thawh a nih mek thu te a sawi.
Healthcare lam ah a bikin nursing and paramedics hmasawnna atan Mizoramin theihna a nei tih sawiin, hnam ziaranga bet tlat handloom leh handicraft ah te, service sector leh thildangah Mizoram chu hmasawn theihna tam tak a nei nia a hmuh thu a sawi a. He business meeting hian India leh ram dang inlaichinna a tihngheh a, rah tha a chhuah ngei a beisei tih a sawi a ni.
Central minister pahnih bakah Mizoram chief minister Zoramthanga leh chief secretary Dr Renu Sharma ten thu an sawi a. B2B meeting-ah state pawn atanga lokal ram palaite leh sumdawngte chu tualchhung industry neitute nen inkawmin, sawrkar department thenkhat, a bikin health, urban development, commerce & industries, tourism, sports leh labour employment, skill development & entrepreneurship lama thawho theihna te sawi a ni.
Palaite tlawh theihin stall siam a ni a. Mizorama industry tenaute thilsiam phochhuah a ni.