Aizawlah Exhibition cum Food Festival

Aizawlah Exhibition cum Food Festival
UD&PA department programme kalpui – Deendayal Antyodaya Yojana National Urban Livelihoods Mission (DAY- NULM) hnuaia Aizawl City Mission Management Unit (CMMU) huaihawt ‘DAY-NULM Exhibition cum Food Festival’ chu Ningani atang khan Aizawlah neih a ni a, tunkar Inrinni thleng a awh ang.
Exhibition hawngtu UD&PA minister K Sapdanga chuan DAY-NULM in mi harsate chhawmdawl a, eizawnna neilote tana eizawnna ngelnghet an neih theihnana hmaa lakpui chu mission ropui tak a ni, tiin, self help group chu Mizoram hmun hrang hrangah sum lakluhna hnar tha taka an hman tawh thu a sawi. Tam zawkin hlawhtlinna kan chan theihnan induhsak tawn nise, tiin, mi tam zawkin he scheme hi an chhawr tangkai a duh tih a sawi a ni.
DAY-NULM Exhibition cum Street Food Festival hi DAY NULM chhawrtute tana buatsaih niin, district hrang hranga neih thin a ni a. Tun tum hi a vawi thumna niin, district dangah chuan kumtir lamah khan an nei tawh a ni.
DAY-NULM hnuaiah hian self help group, street vendors leh skill training hmang tangkaitu an awm a, an dinhmun chawikan nan DAY- NULM hnuaiah hian kawng hrang hranga zirtir leh tanpuina pek an ni. He mission kalpui a nih atangin mi 10733 hnenah training pek ni tawhin, India ram puma hman theih certificate an dawng a, an zinga mi thahnem takin state chhung leh pawnah eizawnna ngelnghet tak tak an hmu tawh a ni.