Aizawlah Hnehna Ni hmang

India ram hmundang rualin Inrinni zing khan Aizawlah Vijay Diwas (Hnehna Ni) puala programme buatsaih a ni a. War Memorial Treasury Square-ah larsap Dr Hari Babu Kambhampati hoa hman a ni.
Larsap hian India sipai huaisente zahna chibai bukin martar-te thlanah pangpar a dah hmasa ber a. Chief minister Lalduhoma, Home minister K Sapdanga, chief secretary Dr Renu Sharma, Padma Shree leh war veteran ni bawk Lalbiakthanga Pachuau, Home commissioner H Lalengmawia, DIG of 23 Sector Assam Rifles Brig Girish Upadhyay, Addl. DGP Ajay Chaudhary leh mi pawimawh dang pawhin zahna lantirin War Memorial-ah hian pangpar an dah a ni.
Hnehna Ni hi kumtin December 16-ah India ram pumah hman thin a ni a. Hemi ni hi India sipaiten Indo-Pakistan War of 1971-ah Pakistan laka hnehna an chan ni leh tunhmaa East Pakistan tuna Bangladesh pian chhuah ni hi a ni. He indonaah hian Pakistan sipaite chu tlawmin an awp ram East Pakistan tia hriat chu Bangladesh tia thlak a ni a. Hemi tum hian Pakistan sipai lalber (Chief of the Pakistan Forces) General Amir Abdullah Khan Niazi chu a sipai 93000 nen hnuaiah Ramna Race Course, tuna SuhrawaryUdyan Dhaka-ah General Jagjit Singh Aurora kaihhruai allied forces (India sipai leh Mukti Bahini) hmaah an inpe a. Hemi ni hi Bangladesh chuan Bijoy Dibos tih hmingpu in an lawm a ni.
Hemi pual hian 23 Sector Assam Rifle chuan an hmun Khatla-ah feet 70-a sang India hnam puanzar an siam a, larsap hian a pawtpharh. Mizoramah hetianga sang India flag phun a la awm loa, tun ami hi a la sang ber rih a ni. Hnehna Ni puala kum 1971 indonaa India sipaite inpekna ropui ngaihsan awm zia lantirna atan he hun hi buatsaih a ni.