Aizawlah Media Conclave -Vartalap

Aizawlah Media Conclave -Vartalap
Press Information Bureau (PIB) bultumin Thawhlehni khan Aizawlah ‘Media Conclave – Vartalap’ neih a ni.
Hmanpuitu IPR&PS minister B Lalchhanzova chuan, India ram inpumkhatna tinghettu leh ram hmangaihna kaiharh theitu, ‘Vande Mataram’ kum 150 tlin lawmna puala hun hman a ni chu lawmawm a tih thu a sawi a. Media Conclave-a zir tur thupuiah ‘GST Reforms 2025: Relief for Common Man, Boost for Business’ chu Mizoram tana thupui pawimawh tak a ni tih a sawi.
Ram tih hmasawnna atan leh ram leilung fate thinlungah neitu nihna thinlung, ram hmangaihna rilru kan put tlan theihnan ‘tax’ chu hmanraw tangkai tak a ni tih a sawi a. Chhiah hmanga ram siamthat hna kalpui a nih theihnan a department chan Land Revenue & Settlement-ah pawh chhiah lak dan kalphung thlak danglam a ni tih sawiin, sawrkar laipui rinchhan ngai lutuk loa inrelbawlna kan kalpui theihnan kawng hrang hranga chhiah pek ngaite kan ngaihpawimawh a tul tih a sawi a ni.
Hmanpuitu dang commissioner of State Tax HK Lalhawngliana chuan ‘GST Reforms 2025’ tih hmangin GST leh a kaihhnawih a sawi a. Mizoramah chak lehzuala chhiah khawn hna kalpui mek a ni a, dik tak leh a hun taka chhiah lakkhawm a nih theihnan ‘Quick Response Team’ din niin, kumin September atanga hman tan, GST 2.0 kalpui a nih hnu ah Mizorama tax lakkhawm a thang zel tih a sawi. Mipui hnenah a hun tak leh dik taka tax pek pawimawhna hrilhhriat kawnga thawhpuiah conclave chhimtute a sawm a ni.
DD Aizawl leh AIR Aizawl thawktute bakah MJA member, ICFAI University leh Mizoram University zirlaite an tel a. Technical session-ah MZU atangin Prof (Dr) Ayangbam Shyamkishor chuan ‘Commemoration of 150 years of Vande Mataram’ tih thupui a sawi a. MZU atangin Prof (Dr) James LT Thanga’n ‘GST Reforms 2025: Relief for Common Man, Boost for Business’ tih a sawi. ‘Adi Karmayogi Abhiyan: Empowering Individuals & Institutions for Tribal Transformation’ tih hmangin Planning & PI deputy secretary Biakthansangi Hrahsel chuan a zirtir bawk.