Aizawlah tour guide inkhawmpui hmang

Tourist Guides’ Federation of India (TGFI) chuan an convention vawi 24-na chu Zirtawpni khan Aizawlah an hmang a. Tourism minister Robert Romawia Royte chuan hmanpuiin, Mizoram Tourism secretary kalchhuak ta, Ministry of Tourism director general ni mek Manisha Saxena chu khualzahawm a ni.
Minister chuan ‘Mizoram Responsible Tourism Policy’ chu India rama a hmasa ber ni turin kum 2020 khan an tlangzarh a. He policy hian tourism-a hmasawnna tluantling leh tlo, ram leilung tichhe lo leh mitin huapzo neih chu a tum ber a ni tih a sawi. Zirna in hrang hrangah Ministry of Tourism duhdanin ‘Yuva Tourism Club’ din a nih tawh thu leh state Tourism department hnuaiah tour guide 89 an awm tawh thu te a sawi a. Mizo tour guide-te TGFI-a an inziahluh ve theihna’n TGFI hruaitute chu hma lakpui turin a sawm a ni.
Khualzahawm Manisha Saxena chuan tourist guide-te chu khualzinte chhawn hmasa ber tu an nih avangin ram hmel lanna pawimawh tak an ni tih a sawi a. India culture-ah mikhualte chu pathian tluka zahna pek (Atithe Devo Bhava) thin an nih thu sawiin, tourist guide-te chu he nunphung mawi tak hi vawnghim zel turin a chah. Tourism-a hmasawnna leh harhtharna tam tak a thlen mek rualin, khualzinte duhdan pawh a inthlak ve zel a. Hmun nuam leh hlu tlawh mai bakah rammite nunphung leh ziarang, eitur leh thiamhnang (handicraft) te tem/tih chhin an chak thin avangin, tourist guide-te chu helam kawnga bengvar thar turin a ngen.
Mizoram Tourism joint secretary V. Lalengmawia chuan “Business Promotional Activities from Mizoram Tourism” tih thupui hmangin thu a sawi a. Ministry of Tourism DG Manisha Saxena bakah assistant director general Niraj Saran leh North East regional director Anil Oraw ten thupui an sawihawng bawk.
TGFI hi kum 1996 a din a ni a. Tourism leh a kaihhnawih sector-a sawrkar laipui puibawm tur leh India rama tourist guide-te hmasawnna ngaihtuah tura din niin, tunah hian tour guide 3400 vel member an nei mek. Convention hmang tur hian India ram hmun hrang hrang atangin tour guide 132 an fuankhawm a, Ningani khan Thenzawl an tlawh a. Vawiin hian Reiek tlang an tlawh ang.