Aizawlah YMA ruihhlo do hnatlang
YMA Rorel Inkhawm, 2024-in “Ruihhlo do kawngah YMA-in tun aia chak zawkin hma la rawh se” tia a lo rel tawh bawhzuina atan, Inrinni khan Central YMA ruahmanna in Aizawl khawpui chhunga YMA branch zawng zawngin an huamchhung theuhah ruihhlo do hnatlang runpui an nei a. Branch engemawzat chu zingkar atanga thawkchhuakin, zan thlenga kalpui an awm.
Hnatlangah hian branch thenkhat chuan ruihhlo that loh zia tarlanna poster an tar a; ruihhlo ngaite awmkhawmna hmun tih fai, ruihhlo ngaite kokhawma counselling pek leh ruihhlo engemawzat man a ni. Branch thenkhatah tleirawl kokhawmin ruihhlo leh HIV/AIDS chungchanga an hriat tul inhrilh a ni.
Central YMA hnuaia ruihhlo do pawl – Central Anti-Drugs Squad (CADS) in hnatlang hi an vil a. Branch engemawzatin ruihhloa inhnamhnawih an man chhuizui ngaite CADS-ah an thlen nual a, hengte hi CADS duty-ten an chhuizui a ni. Aizawlah hian YMA Branch 109 a awm a, mitthi leh programme neih laklawh avangin branch thenkhat hnatlang ve thei lo an awm a, heng branch ho pawh hian hun remchangah hnatlan an tum a ni.
Aizawlah YMA ruihhlo do hnatlang
Get real time updates directly on you device, subscribe now.