Aizawlah zirtirtu 164 sawn lut tawh

Sorkar enkawl sikula zirtirtute an insawn thin a, nikum lam atangin zirtirtu a hlawma sawn an awm thin. Aizawl atanga khaw danga awm tura sawn an awm a, thingtlang atanga Aizawla sawn an awm bawk.
2023 December atanga kumin July ni 31 thleng khan thingtlang atangin Aizawlah zirtirtu 164 sawn luh an ni tawh.
Kar hmasaa neih assembly session-ah khan Hachhek bialtu Robert Romawia Royte zawhna chhangin education minister Dr Vanlalthlana’n thingtlang atanga Aizawla zirtirtu sawn luh zat hi a sawi a, a tam ber chu higher secondary school zirtirtu an ni.
Minister chhannaa a lan danin, sorkar sikul (govt school) bikah higher secondary school zirtirtu, thingtlang atanga Aizawla sawn luh hi mi 38 an ni a, high school headmaster 13, high school zirtirtu 10, middle school zirtirtu 11, primary head 16, primary school zirtirtu 27 te Aizawlah sawn luh an ni bawk.
SSA hnuaiah primary zirtirtu panga, upper teacher pariat, general teacher pahnih leh lecturer pahnihte Aizawlah sawn luh an ni bawk.
January ni 1, 2024 hnua zirtirtu sawn (transfer) tawh zawng zawng hi mi 300 chuang an ni a, primary school zirtirtu 108, middle school zirtirtu 105, high school 107 an ni.