Aizawlin tui thianghlim tam zawk a dawng thei thuai dawn – Dy CM

Aizawlin tui thianghlim tam zawk
a dawng thei thuai dawn – Dy CM
SIPMIU hmalaknaa Aizawl khawpui chawmtu tur tur tui thianghlimm lakna, Setlak rama ruahman mek chu zawh hnaih a ni tawh a. Reilote ah Aizawl khawpuiin tui thianghlim tam zawk a dawng thei thuai dawn tih deputy chief minister Tawnluia chuan a sawi.
Tanhril Setlak rama Urban Development & Povery Alleviation hnuaia SIPMIU hmalakna ‘Augmentatio of Water Supply and Construction of 37 MLD Water Treatment Plant’ chu Inrinni khan UD&PA changtu deputy chief ministerhian tlawhin, hnathawh dan leh project dinhmun a enfiah.
37 MLD Water Treatment Plant-hi Aizawl khawpui tana tui thianghlim lakna tur hmun thar niin, Aizawl hmarlam veng chawm tura duan a ni. Aizawl Greater Water Supply Scheme Phase I& II aiin a tui pump chhuah theih zat a tam zawk a, Phase I&II hian nitin tui thianghlim litre maktaduai 28 atanga 34 vel a pump chhuak thei a. Tun ami hian nitin tui thianghlim litre maktaduai 37 pump chhuak thei tura ruahman a ni. Hman theih a nih hunah chuan Aizawlin tun aia let hniha tamin tui thianghlim a hmu thei dawn a, ram pum huapa mi pakhatin nitin tui thianghlim a dawn tur zat bituk – litre 135 hmu thei tura duan chu a takin hman theih a ni dawn a ni.
SIPMIU director Er Lalrothanga sawi danin, he project hi thawh zawh tep tawh a ni tawh a. Tui pump khawl chawmtu tur 33 kV line Sihhmui atanga kal tur chu peihfel loh deuh niin, tui pipe phum tur Hunthar – Chanmari West-ah metre 100 vel a la awm a, he project hian kum 2033 thleng Aizawl khawpui tui mamawh a phuhru tura ngaih a ni.
Deputy chief minister chuan tui hi pump theih a nih hnuah pawh a sem chhuahna lamah uluk taka hma lak zel a ngai tih sawiin, felfai taka thawh a nih theihna’n theihtawp chhuah a ngai dawn tih a sawi. “Reilote ah Aizawl khawpuia chengten tui thianghlim tam zawk an dawng thei dawn a, tui harsatna chuan ziaawm lam a pan thuai dawn a, a lawmawm hle a ni,” a ti.
Aizawl mipui nghahfak a nih thu sawiin, mipui beisei ang taka tha leh chhawrtlak a nih theihna’n project khawihtu leh enkawltu SIPMIU leh contractor-te chu uluk leh tha taka hna thawk zel turin a chah.