Al-Hilal be tura phalna pek tawh Mbappe

Al-Hilal be tura phalna pek tawh Mbappe
World record transfer fee ni chiang val val turin tunhnaiah Saudi Arabian club hausa Al-Hilal chuan pound maktaduai 259 tehrengin Paris St-Germain hnenah Kylian Mbappe lei dilna an thehlut a, Ligue 1 giants lamin an kianga contract pawtsei duh tawh lo French forward chu man nei loa chhuahtir an tum lo nasa mai a, Arab team dawrna hi pawm nghal hmiahin, an forward pawh chu dan anga Al-Hilal nena inbe turin phalna an pe nghal hmiah!
Tarlan tawh thin angin, kum 24 mi lek ni chunga France captain ni thei tawh Mbappe hian a contract neih laiah kum khat hun la nei mah se Europe club inelna lian bera champion thei lo French champion tana inremna thar ziah a hnial fithla tawh a, Japan rama pre-season tour an kalpui mekah pawh squad-ah a tel lo.
PSG hian man a la neih laia an hralhchhuah vat loh chuan nakum nipui lai khian free agent ni chungin Mbappe an chhuahtir a ngai dawn a, chu thil chu thlentir an tum lo bur niin a lang!
PSG-in kum 2017-a pound maktaduai 200 senga Barcelona atanga Neymar an leina man kha tun thlengin player lei leh hralhna man to ber a la ni a, Mbappe leh Al-Hilal hian an khum thei dawn niin a lang.
Kum 2017 veka Monaco atanga PSG-in pound mak-taduai 166 senga an lei Mbappe hi English club hraw pathum – Chelsea, Manchester United leh Tottenham bakah Inter Milan leh Barcelona pawhin an duh thu an tarlang vek tawh a, mahse, free agent a nih loh chuan club na zawng tan French striker hi beisei chi a ni dawn lo a, amah hi chuan a free-a PSG chhuahsan a duh thu a lo sawichhuak tawh a, Arab club hian sum tam tham lutuk hlawh turin dawr mah se a vanglai thlen chhoh mek laia Champions League khel thei lo tur zawnga Asian team zawm chu a duh chiahin an ring lo a, Real Madrid a thlan rinna a lian.
Tun dinhmuna thawm neilian ber rawn ni chho ta Al-Hilal hi Saudi Arabia rama Public Investment Fund lamin club engemawzat an enkawl zinga pakhat niin, he team hian kumin nipui thawt lai hian Wolves atangin Ruben Neves leh Chelsea atangin Kalidou Koulibaly pawh an lo senglut fel tawh a ni.
Al-Hilal lamin an ngamna zat tarlang chunga PSG an dawr chungchangah Mbappe hian vantlang hriatah eng thu mah a la sawichhuak chiah lo a, Twitter lama NBA star Giannis Anteto-kounmpo fiamthu erawh a lawm viau niin an sawi.
Greek basketballer ropui Antetokounmpo chuan fiam-thuin, “Al Hilal hian an duh chuan min lalut ve thei ang, Kylian Mbappe nen kan inang tlat,” tiin fiamthu a thawh.
He tweet a hmuh rualin Frenchman hian mittui tla phung chunga nui lai lem (emoji) a tlar tuar!
Media-te tarlan danin, Mbappe hian Al-Hilal hi zawm ta se kum khata a hlawh tur hi euro maktaduai 700 tehreng a tling dawn a, thla khatah euro maktaduai 58.33 hlawhin, chawlhkar khata a hlawh tur zat chu euro maktaduai 13.46 a ni ang a, nikhata a rate pawh euro maktaduai 1.92 la tling phain, darkar tin euro 80,128 hlawh kaiin, minute tin euro 1,335 a la pha ang a, second khata a hlawh tur pawh euro 22.25 a la ni fang dawn!