Alabama-ah Nitrogen gas hmangin tihlum

US State Alabama chuan tualthattu Kenneth Eugene Smith chu nitrogen gas hmangin an tihlum a, capital punishment atana nitrogen gas hman hmasak ber a ni.
Kum 58-a upa Smith chuan Supreme Court-ah tum hnih appeal a siam chu a hlawhchhampui ve ve hnuah tihhlum a ni ta a ni.
Kum 2022 khan Alabama chuan Smith hi lethal injection hmanga tihhlum a lo tum tawh a, a hlawhchham hlauh thung. Smith hi kum 1989-a preacher nupui Elizabeth Sennett a that a ni.
Death Penalty Information Center chuan Smith chu khawvel puma pure nitrogen gas hmanga tihhlum hmasak ber tiin a sawi a.
Alabama leh US state pahnih dangte chuan misual uchuakte tihhlum nana lethal injection te hmuh tur a van tak zel avangin a aiah nitrogen hypoxia chu hman an rem ti a ni.
Tihhlum a nih lai entir hian media member panga te chu Holman Correctional Facility, Atmore-ah hriatpuitu ni tura phurh an ni a.
Nitrogen gas chu a mask-ah tihluh a nih hnuah Smith chu nui sakin a chhungte amah en rengtute lam chu enin a bu nghauh a ‘Ka hmangaih che u’ tih a lantir zui a.
Mita hmutute chuan minute hnih atanga minute li vel chu a vial a, chumi hnuah minute nga vel chhung thawk la hawk hawka a awm hnuah a thi zui tiin an sawi.
Nitrogen gas te oxygen tel lova hip luh chuan taksaa cell te tithi nghalin thihna a thlen zui nghal thei a ni.
Alabama Governor Kay Ivvey chuan Smith thih thu a puang zui a. “Kum 30 chuang zet system game a khelhpui hnuah Smith chuan a thiltihsual rapthlak tak chhanna a hmu ta” tiin a sawi a.
“Elizabeth Sennett family te chu kum tam tak hnuah leh channa nasa tak an neih hnuah an hahdam thei tawh ang,” tiin a sawi bawk.
Attorney General Steve Marshall chuan nitrogen gas hman chu ‘tha leh intihhlum nana remchang zawk’ tiin a sawi a, ‘Justice lantir a ni’ tiin a sawi zui bawk.
Alabama thuneitute chuan court filing an neihnaah Smith chuan second rei lo teah hriatrengna a hloh thu sawiin minute rei lo te hnuah a thi zui tiin an ziak lang a ni.
Smith kha March 1998-a Sennett dollar 1,000 hlawha tihhlumnaa inhnamhnawih pahnih zinga pakhat a ni a. Smith chuan Sennett kha inchhunga meichhemna bulah a awmah leh nghawngah vitin a thih hnuah pawh inrawk tum tena an tih ang takin a kalsan a ni.
Sennett that tura ruaitu chu a pasal Charles Sennett niin leiba ngah lutuk Pathian thusawi niin a nupui thihna atangin insurance money lak theih a inbeisei vang a ni a. Charles Sennett chu a hnuah a nupui thihna investigation neih laiin amah a intihlum a ni.
Smith a thurualpui John Forrest Parker chu kum 2010 khan tihhlum a lo ni tawh a. Trial neihnaah Smith chuan Sennett an thah laiin a hmunah a awm ve thu leh mahse kutthlaktu a ni lo a inti tlat thung.
Sennett fapa Charles Sennett Jr chuan media interview a neihnaah Smith chu khawngaihna a neih bik loh thu a sawi a. “Mi thenkhat ten amah tihhlum ve kher a ngai hleinem an ti a” tia sawiin, “Ka nu kha tawrh dan tur a zawt bik lo. An that tawp mai a, tum tam an vit a ni” tiin a sawi.