Alcaraz a chak awlsam

French Open 2025 khelh mekah Thawhehni zan khan champion lai Carlos Alcaraz chuan Tommy Paul lakah awlsam takin hnehna a chang a, semi-final a lut. Alcaraz hian semi-final-ah Lorenzo Musetti a hmachhawn zui leh dawn.
Champion lai Carlos Alcaraz hian pre quarter-final-ah inkhel harsa tak a hmachhawn a, ball vaw na tak Ben Shelton a hmachhawn. Ben Shelton a hneh hnuin American Tommy Paul a hmachhawn zui leh. Shelton aia tawnhriat nei tha zawk Paul lakah duhthusama thain a inlan ta thung a, set hloh lova hnehna changin champion nawn leh a hnaih a deuh deuh zel a, champion nawn leh turin vawi hnih chak chiah a mamawh tawh.
Alcaraz hian quarter-final-a a khingpui Tommy Paul a ngam viau a, set khatnaah a khingpui serve a break vek a, game khat te pawh hloh duh lovin set a la. Awlsam taka set a lak hnuin set hnihnaah a khel tha chhunzawm a, Paul serve a break zawn leh a, game khat chiah hlohin set a la zui leh a, semi-final a hnaih viau tawh. Game hnih la zawn tawh Alcaraz hian set thumnaah break pawimawh tak neiin set a la zui leh a, Tommy Paul lakah hian 6-0, 6-1, 6-4 in hnehna a chang a, semi-final a inhlangkai zui ta a ni.
Thawhleh zana inkhel dangah Italian Lorenzo Musetti chuan tualchhung tlangval Frances Tiafoe chu set khat hloh chungi n a hneh a, a vawi hnih nan Grand Slam semi-final a lut.
Musseti hian tualchhung tlangval Tiafoe lakah bul a tan tha a, awlsam takin set khatna a la. |antu ngah Tiafoe hian set hnihna la bawk mah se inkhel hmuhnawm takah set hnih a loh zawn a. Musetti hian 6-4, 4-6 7-5 6-2 in hnehna a chang zui ta a ni.
Musetti hian semi-final-ah inkhel hautak zawk a hmachhawn a ngai dawn a, champion lai Alcaraz a tum dawn. Alcaraz hi an intum hnuhnung vawi ngaah a hneh lo vek a. Alcaraz hneh a, Final lut thei turin thil mak thlentir a mamawh ang.