Alcaraz-a Madrid zinkawng a tawp

Champion lai ni chungin Spaniard Carlos Alcaraz chuan quarter-final match a paltlang zo lo a, a zawna Madrid Open title vawithum la thei hmasaber nih a tumna a puitlin zo lo.
Second seed Alcaraz hi Russian seventh seed Andrey Rublev chuan 4-6 6-3 6-2-in a hnawtchhuak a, Spanish clay leilung bik match 25 chhunga a tlawm vawikhatna a nih bakah he tournament-a match 14 a chak tluang lai a tawp fel ta bawk.
Kum 20-a upa Alcaraz hian Thawhlehni khan last 16 match-ah harsa tak chungin Jan-Lennard Struff a paltlang hram a, Rublev lakah pawh a khelh that theih dan berin a khel chhuak zo lo zui leh ta a ni.
|um hnih Grand Slam champion ni ve tawh Alcaraz hian a ban dinglam a tihnat avangin April thla tir lam khan Monte Carlo leh Barcelona lamah clay court tournament a khel thei lo a, French Open inbuatsaihna dang Madrid lamah pawh beisei a pha lo chhunzawm a, last eight match-a Rublev a hmachhawn tumin set hmasaber la bawk mah se a hnu lamah a chau tih a hriat theih a, set hnuhnung pahnihah a tlawm chiang viau a ni!
Thawhlehni round of 16 inkhel pakhatah he tournament-a vawinga champion tling tawh Rafael Nadal chu Jiri Lehecka ngam loin a tla fel tawh a, Nilaini zana Alcaraz a tlawm zui leh tak avangin tualchhung player kuta Madrid title luh beiseina a tawp fel ta a ni.
A career-a ATP 1,000 title vawikhat chiah la hawn thei Rublev tan Alcaraz laka match li a tlawm zawn tawhna atangin hnehna a changkir a, semi-final match pakhat zawkah American 12th seed Taylor Fritz a tum leh ang.
Fritz hian last eight match dangah 6-1 3-6 6-3-in Argentina player Francisco Cerundolo a hneh.
A khel bawr ding lam a tihnat avangin last eight match pakhat khel tur World No 2 Jannik Sinner a inhnukdawk a, a tumpui tur Felix Auger-Aliassime chuan walk-over hmanga hnehna hahdam changin semi-final a lut.
Kum 22 mi Italian Sinner chuan Madrid atanga inhnuhdawh a ngai ta chu lungchhiatthlak a tih thu a sawi.
Canada chhuanvawr Auger-Aliassime hian Lehecka leh Russian third seed Daniil Medvedev inkhela chak zawk zawk a tum leh ang.
Women’s draw lamah defending champion Aryna Sablenka pawhin semi-final lutin, Russian tleirawl kum 17 mi lek Mirra Andreevas lakah break point pakhat pawh hmachhawn loin 6-1 6-4 hnehna a chang.
Belarusian Sablenka hian kumin January thla Australian Open trophy a lak hnua a vawikhatna atan semi-final a lut a, Elena Rybakina a hmachhawn leh ang.
Second seed Rybakina hian last-four lut turin Kazakh Yulia Putintseva lakah set hmasaber a hloh zet a, 4-6 7-6 (7-4) 7-5 hnehna a chang hram a ni.
Fourth seed leh 2022 Wimbledon champion ni bawk Rybakina chuan a tum leh tur Sabalenka nena an inhmachhawn tur boruak sawiin, inbeihna hautak a nih leh ngei tur thu a sawi.
Kumin kumtir lam khan Brisbane International final-ah an lo intawng tawh a, tah chuan Rybakina a lo chak tawh a ni.