Alcaraz hmaa ding tur Zverev

Australian Open 2024 khelh mekah thawhtanni khan Carlos Alcaraz chuan set hloh lovin hnehna a chang a, quarter-final a lut. Inkhel dangah Alexander Zverev chuan harsa takin Cameron Norrie a hneh a, Carlos Alcaraz hmachhawn turin quarter-final a lut ve bawk.
Champion tura rinkai ber zinga mi Carlos Alcaraz hian fourth round-ah Miomir Kecmanovic a hmachhawn a, set hloh lovin hnehna a chang. World No. 2 Alcaraz hian set khatna leh set hnihnaah break vawi khat ve ve a nei a, game lo hloh chungin set a la zawn. Set hnih a la zawn hnuin a set thumnaah a khel tha leh zual a, game zawng zawng la fai vek a, 6-4, 6-4, 6-0 a hnehna changin quarter-final a lut.
Alcaraz hmachhawn a, fiahna hautak hmachhawn zui turin Olympic champion Alexander Zverev chuan harsa takin fourth round a paltlang ta, set nga an khelh hnuin Cameron Norrie a paltlang thei hram.
Zverev leh Norrie te hian set khatna atangin inkhel hmuhnawm an lantir nghal. Set khatna hmuhnawm takah German Zverev-a’n break pawimawh tak a nei a, set hmasa la. Set khatna a hloh hnuin British chhuanvawr Norrie a insiamtha a, game thum hloh chungin set a la let. Set khat ve ve an lak hnuin set an inlakchhawk leh phawt a, chumi hnu chuan deciding set khelh a ni. Deciding set ah break an nei thei lo ve ve a, tie-break khelh a ngai. Tie-Break ah hian Zverev a chungnung ta viau a, 7-5 3-6 6-3 4-6 7-6 (10-3) a hnehna changin quarter-final a lut zui ta a ni.
Quarter-final a intum tur Alexander Zverev leh Carlos Alacaraz te hi vawi kua an inhmachhawn tawh a, Zverev hian vawi ruk hnehna chang tawhin a chungnung zawk mek a. Vawi thum tlawm zawkah an tang ve tawh thung. An intum hmasa lamah tlawm zawn thin mah se Alcaraz hian an inkhelh hnuhnung vawi thumah hnehna a chang zawn ve thung. Heti a nih vang hian Australian Open 2024 ah pawh hian hnehna changin, semi-final luh ngei a inbeisei.