Alcaraz hmachhawn tur Berrettini

Wimbledon 2023 khelh mekah champion tura rinkaite an chak chho zel a. lst 16-ah World No. 1 Carlos Alcaraz leh Wimbledon finalist Mateo Berrettini te an inhmachhawn dawn a, Alcaraz tan fiahna hautak a ni ngei dawn. Wimbledon-a vawi sarih champion tawh Novak Djokovic chuan nizan khan Hubert Hurkacz a hmachhawn a, a chak a nih chuan quarter-final-ah Andrey Rublev a hmachhawn zui leh ang.
World No. 1 Carlos Alcaraz hian inrinni zan khan fourth round-ah Nicolas Jarry a hmachhawn a, inkhel hautak, darkar li dawn inkhelah set khat hloh chungin hnehna a chang a, last 16 a inhlangkai. US Open champion Alcaraz hian Jarry lakah bul a tan tha a, set khatnaah game thum chauh hlohin set a la. Awlsam takin set khatna la mah se set hnihnaah Jarry a khel tha ta viau thung. Set hnihnaah hian game an inlak chhawk zak zak hnuin tie-break khelh a ngai a, tie-break-ah Jarry chungnungin set a la let.
Set khat ve ve an lak hnuin inkhel a hmuhnawm zui viau a. Jarry phur thar viau mah se Alcaraz chu set la hmasa zawkah a tang a, set thumnaah game thum bak a hloh lo. Chak tura rinkai zawkin set a lak nawn leh vangin Jarry dinhmun a khirh viau tawh a, zamna nasa tak nen a inlanzui ta reng bawk. A hmabak thim viau tawh mah se hmuhnawm takin set lina an khel a, Alcaraz hian break pawimawh tak a neih a chhawr tangkai a, set a la nawn leh. Tichuan, 6-3 6-7 (6-8) 6-3 7-5 a hnehna changin last 16 a inhlangkai zui ta a ni.
Nicolas Jarry hnehtu Alcaraz hian last 16-ah fiahna hautak zawk a hmachhawn dawn a. Grass a chetha thin Mateo Berettinni a hmachhawn zui a ngai dawn. Alacaraz hmachhawn tur Berrettini hian inrinni zana a khingpui German 19th seed Alexander Zverev chu inkhel hmuhnawm takah set hloh lovin a hneh a, last 16 a lut.
Kum 2021-ah Wimbledon-a pahnihna Berrettini leh Zverev te hi an inhnehtawk viau a, point khat hmu tur ngawt pawhin an beih fe a ngai thin. Berrettini hian set thum la zawn mah se an khel a hmuh-nawm a, an inthlau lo viau nghe nghe.
Grand Slam champion la ni tura rinkai zinga mi Berrettini hian Zverev lakah bul a tan tha a, set khatnaah break a neih chhawr tangkaiin, game thum chiah a hloh. Set hnihnaah an inbei tawk zui ta viau a, tie-break-ah Italian a chungnung zui leh. Olympic champion Zverev-a’n set hnih a hloh zawn hnuin set lak ngei tumin tan a khawh a, set thumnaah Ber-rettini a bei let nasa hle. Set thumnaah hian tie-break khelh a ngai leh a, Berrettini bawk chung-nung zui lehin, 6-3 7-6 (7-2) 7-6 (7-5) a chak a, last 16 a lut ta a ni.
Lat 16 a intum tur Carlos Alacaraz leh Matteo Berrettini hi vawi thum an inhmachhawn tawh a, vawi hnih chak zawka tang Alcaraz chungnung zawkah a tang rih. Australian Open 2022-ah Berrettini hian Alcaraz a hneh a. Alcaraz hian Hard Court leh Clay-ah Berrettini a hneh ve leh thung. Grass-ah a vawi khat nan an inhmachhawn dawn a. Grass-a tawnhriat ngawh Berrettini tan chak theihna hun tha a inhawng tura ngaih a ni a. An inkhel tur hi inkhel hmuhnawm tak a nih ngei a rinawm.
Inrinni zana chak langsar zingah third seed Daniil Medvedev leh Stefano Tsitsipas an tel. Rusian Medvedev hian a khingpui Marton Fucsovics a hneh a. Tsitsipas chuan a khingpui American Chris Eubank lakah 6-4 7-6 (7-5) 6-4 in hnehna a chang ve bawk.
Zirtawp zan khan champion lai Novak Djokovic chuan Grand Slam-ah vawi hnih ngawt a hneh loh tawh Stan Wawrinka a hmachhawn a. Wimbledon-a vawi li ngawt champion zawn tawh Djokovic hian a veteran pui Wawrinka hi 6-3 6-1 7-6 (7-5) in a sawp a, awlsam takin last 16 a lut. Nole hian nizan khan Hubert Hurkacz a hmachhawn zui leh.