Alcaraz hmachhawn tur Zverev

US Open 2023 khelh mekah quarter-final-a intum tur a hriat kim ta a. Champion lai Carlos Alcaraz leh Alexander Zverev an inhmachhawn dawn a. Quarter-final lehlamah Daniil Medvedev leh Andrey Rublev an inhmachhawn dawn bawk.
Thawhtan zan khan champion lai Carlos Alcaraz chuan Italian Matteo Arnaldi a hmachhawn a, harsatna lian tawk lovin hnehna a chang. Arnaldi a hneh leh tak vangin US Open a khelh hnuhnung vawi 16-ah vawi 15 zet Alcaraz hian hnehna a chang zawn tawh a, champion nawn leh turin rin a kai deuh deuh zel.
Alcaraz leh Arnaldi te hi an vawi khat intumna a ni a, an kum a la naupang dun bawka an inhnehtawk viau tura ngaih a ni. Set khatna tir lamah game hnih an la zawn nghal ve ve a, an inhnehtawk chho viau tura ngaih a nih laiin Alcaraz a chungnung leh ta viau thung. Alcaraz hian break a nei zawn a, game thum chiah chungin set hmasa ber a la.
Set hnihnaah pawh Alcaraz a chungnung zui leh viau a, a khingpui a bazar kual tir nasa thei hle. Boruak sanga tawnhriat ngah zawk a nihna a chhawr tangkai a, Arnaldi lakah a game a nghet tha viau. Set hnihnaah pawh hian game thum chiah hloh chungin set a la nawn leh a, awlsam takin a chak dawn tih a lang tlang deuh ruak tawh.
Set hnih a hloh zawn hnuin Matteo Arnaldi-a’n bul a tan tha ve thung a, a serve a hum bakah break a nei nghal. 3-0 a hmahruai thei dinhmuna a din laiin a che sual zui leh ta mai thung a, a serve a hum zo lo. Game an inlak chhawk zak zak hnuin game pawimawh takah Arnaldi hian a serve a hum zo lo nawn leh a, Alcaraz hian 6-3, 6-3, 6-4 a in hnehna a chang a, quarter-final a lut zui ta a ni.
Awlsam taka Alcaraz a chak lai hian mipa lama ngaihven hlawh zinga tel pahnih Alexander Zverev leh Jannik Sinner ten inkhel hmuhnawm an lantir a. Darkar nga chhung zet inkhelah German player Zverev-a’n harsa takin hnehna a chang a, quarter-final a lut.
Olympic champion Zverev hian Sinner lakah bul a tan tha a, set khatnaah break pawimawh tak a neih vangin set la hmasa zawkah a tang. Set khatnaah chesual mah se Sinner hi set hnihnaah a insiamtha a, game thum hloh chungin set a la let. Set thumnaah Zverev a khel tha ve leh thung a, break nei zawnin, awlsam takin set a la. Malpui hliamin a tihbuai Sinner a tlawm mai lova, set linaa a la ve leh. Set hnih e ve an lak hnuin deciding set-ah Zverev a che fuh nawn leh a, hma taka break a neih vangin set a la nawn leh a, 6-4 3-6 6-2 4-6 6-3 a hnehna changin quarter-final a lut.
Quarter-final-a inhmachhawn tur Carlos Alacaraz leh Alexander Zverev te hi vawi nga an lo inhmachhawn tawh a, vawi thum chak zawkah tangin Zverev a chungnung zawk. Alcaraz-a’n Zverev a hnehna hi Clay-ah ve ve a ni a. Indoor Hard-Court-ah erawh chuan Zverev lakah set lak a la nei lo thung a. A khelh thiamna hmun clay-ah vawi khat chu Zverev hi a ngam lo tawh bawk. Zverev hian Hard Court-a a ngam than Alcaraz hi hneh nawn leh thei ngei turah ngaiin, a ngam viau dawn a. Alcaraz hian a champion na mualah Zverev hneh thei ngei turah a inngai dawn bawk a, nilai zanah inkhel hmuhnawm an lantir ngei tura ngaih a ni.
Quarter-final-ah Alcaraz leh Zverev te an intum laiin lehlamah Russian pahnih Daniil Medvedev leh Andrey Rublev te an inhmachhawn ve thung dawn. US Open-a vawi khat champion tawh Medvedev hia last 16-a a khingpui Alex de Minaur chu 2-6 6-4 6-1 6-2 in a hneh a. Rublev chuan a khingpui Jack Draper a paltlang ve bawk.